ލިސްޓަށް އުނި އިތުރު ނުގެނެސް ފުލެޓް ދޭން އަންގަން ރައްޔިތުންގެ މަޖިލީހުން ފާސްކުރި ނަމަވެސް އެ އެންގުމަށް ތަބާ ނުވާނެކަމަށް ދިވެހި ސަރުކާރުން ހާމަކޮށްފިއެވެ.

ކުރީ ސަރުކާރުން ހިންގި "ގެދޮރުވެރިޔާ" ސްކީމްގެ ދަށުން ފްލެޓް ލިބޭނެ ކަމަށް ކަނޑައަޅައި ގެޒެޓްކޮށްފައިވާ ލިސްޓަށް އެއްވެސް އުނިއިތުރު ކަމެއް ނުގެނެސް، އެ ލިސްޓުގައިވާ މީހުނަށް ފްލެޓް ދޫކުރަން ސަރުކާރަށް އަންގަން މަޖިލީހުގެ ގައުމީ ތަރައްގީއާއި ތަރިކައިގެ ކޮމެޓީން ބެލުމަށްފަހު، ކުރީ ސަރުކާރުން ނެރުނު ލިސްޓަށް ބަދަލެއް ނުގެންނަން ސަރުކާރަށް އެންގުމަށް ފާސްކޮށް ހޯމަ ދުވަހުގެ ޖަލްސާގައިވަނީ 29 މެމްބަރުންގެ ވޯޓުން ތަޅުމުގައިވެސް ވަނީ ފާސްކޮށްފައެވެ.

ކުރީ ސަރުކާރުން ނެރުނު ލިސްޓަށް ފްލެޓް ދޫކުރަން ސަރުކާރަށް ގޮވާލަން ރިޕޯޓެއް ފާސްކޮށްފައިވާއިރު، މީގެ ކުރިން އޭސީސީއިން އެ މައްސަލަ ބެލުމަށްފަހު ބުނެފައި ވަނީ އެ ލިސްޓުގައި ހިމެނޭ 60 ޕަސެންޓް މީހުން ޝަރުތު ހަމަނުވާ ކަމަށެވެ. އެއްވެސް މައްސަލައެއް ނެތި ޝަތުރު ހަމަވަނީ އެންމެ 20.7 ޕަސެންޓް މީހުން ކަމަށެވެ. އަދި ޝަރުތު ފުރިހަމަ ވިޔަސް 19.7 ޕަސެންޓް ފޯމުގައި އެކި މައްސަލަތައް ހުރި ކަމަށެވެ.

އެކަމާ ގުޅޭގޮތުން ނޫސްވެރިއަކު ސުވާލު ކުރުމުން ރައީސް އޮފީހުގެ އިސް ތަރުޖަމާން ހީނާ ވަލީދު ވިދާޅުވީ އެއްވެސް ރައްޔިތެއްގެ ހައްގު ގެއްލިގެން ދިއުމަކީ ސަރުކާރުން ބޭނުންވާ ގޮތް ނޫން ކަމަށެވެ. ކުރީ ސަރުކާރުން ފްލެޓް ދޫކުރި ގޮތާ ގުޅޭގޮތުން އޭސީސީގެ ތަހުގީގު ރިޕޯޓެއް އެބަ އޮތް ކަމަށާ އެ ރިޕޯޓް ބޮލާލާ ޖަހާ ވަކި ގޮތަކަށް ކަންކަން ކުރުމުން އެތައް ބައެއްގެ ހައްލު ގެއްލޭނެ ކަމަށް ހީނާ ވިދާޅުވިއެވެ.

ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން މާލޭގައި ދިރިއުޅޭ މީހުންނަށް ފްލެޓު ދިނުމަށް ހިންގި ‘ގެދޮރުވެރިޔާ’ ސްކީމުން ފްލެޓު ލިބޭ މީހުންގެ ދާއިމީ ލިސްޓެއް ދައުރުގެ ފަހުކޮޅުގައި ވަނީ ގެޒެޓުކޮށްފަ އެވެ. ރައީސް ސޯލިހުގެ ވެރިކަން ނިމުނުއިރު ވަނީ ފްލެޓު ލިބުނު ބައެއް މީހުންނާ އެކު ފްލެޓު ކަނޑައަޅާ އެއްބަސްވުމެއްގައި ސޮއިކޮށްފައެވެ.

އެގޮތުން ކުރީ ސަރުކާރުން ނިންމާފައި އޮތީ ޝަރުތު ހަމަވާ ހުރިހާ އެންމެންނަށް ވެސް ފްލެޓް ދޭށެވެ. ފުރަތަމަ ނެރުނު ލިސްޓުގައި 15،046 މީހުން ޝަރުތު ހަމަވާ ކަމަށް ވަނީ ކަނޑައަޅާފަ އެވެ. ނަމަވެސް އޭރު އަޅަން ފަށާފައި ވަނީ 4000 ފްލެޓެވެ. އެހެންކަމުން ފުރަތަމަ 4000 ފްލެޓް ލިބޭނީ ޕޮއިންޓް ތަރުތީބުން، އެންމެ މަތިން ޕޮއިންޓް ލިބޭ މީހުންނަށް ކަމަށް އޭރު އޮތީ ކަނޑައަޅާފައެވެ.