މިދިޔަ އަހަރުގެ ތެރޭގައި ރައީސް އިބްރާހިމް މުހައްމަދު ޞާލިހްގެ ސަރުކާރުން އެއް ބިލިއަން ޑޮލަރު ދަރަންޏަށް ނެގުމާ ގުޅިގެން، ދައުލަތުގެ ދަރަންޏާއި ގެރެންޓީ ދީފައިވާ ދަރަނީގެ އަގު 8 ބިލިއަން ޑޮލަރަށް އަރައިފި ކަމަށް ވޯލްޑް ބޭންކުގެ ރިޕޯޓަކުން ހާމަވެއްޖެއެވެ.
އެގޮތުން ވޯލްޑް ބޭންކުން އެންމެ ފަހުން އާންމުކޮށްފައިވާ ރާއްޖޭގެ ޑިވެލޮޕްމަންޓު އަޕްޑޭޓު ރިޕޯޓުގައިވާ ގޮތުގައި މިދިޔަ އަހަރު ނިމުނުއިރު ދައުލަތުގެ ދަރަނި ހުރީ ގައުމީ އުފެއްދުންތެރިކަމުގެ ނިސްބަތް (ޖީޑީޕީ) ގެ 122.9 ޕަސެންޓުގަ އެވެ.
އޭގެ ކުރީ އަހަރު ނިމުނުއިރު މި އަދަދު ހުރީ 114.5 ޕަސެންޓުގައެވެ.
މިދިޔަ އަހަރު ރައީސް ޞާލީހްގެ ސަރުކާރުން ދަރަންޏަށް ނެގި ފައިސާއަކީ ތަރައްގީގެ ޕްރޮޖެކްޓުތައް ހިންގުމަށާއި ސަރުކާރުގެ ހަރަދުތައް ކުރަން ބޭނުންކުރި ފައިސާ އެވެ.
ދަރަންޏަށް ފައިސާ ނަގައިގެން ހަރަދު ކުރަން ޖެހުނީ މިދިޔަ އަހަރުގެ ބަޖެޓު ޑެފިސިޓު ބޮޑުކަމުންކަން ފާހަގަކޮށްލެވެއެވެ.
މިދިޔަ ސަރުކާރުން ދަރަންޏަށް ނެގި ފައިސާގެ ތެރޭގައި އެތެރެ އާއި ބޭރުގެ ބާޒާރަށް ސެކުއިރިޓީސް ވިއްކައިގެން ހޯދި ފައިސާ އާއި ބޭރުގެ މާލީ އިދާރާތަކުން ނަގާފައިވާ ލޯނުތައް ހިމެނެ އެވެ.
އެހެންނަމަވެސް މުޅި އަހަރަށް ބަލާއިރު ގިނައިން ފައިސާ ހޯދާފައި ހުރީ އެެތެރޭގެ ބާޒާރުންނެވެ.
