މޯލްޑިވްސް އިސްލާމިކް ބޭންކް (އެމްއައިބީ) އިން ރާއްޖޭގެ އިތުރު 19 ރަށެއްގައި އޭޓީއެމްގެ ހިދުމަތް ގާއިމު ކުރުމުގެ އެއްބަސްވުމެއްގައި އިކޮނޮމިކް މިނިސްޓްރީއާ އެކު ސޮއިކޮށްފި އެވެ.

މި އެއްބަސްވުމުގައި އިކޮނޮމިކް މިނިސްޓްރީގެ ފަރާތުން ސޮއިކުރެއްވީ، މިނިސްޓަރު މުހައްމަދު ސައީދު އެވެ. އިސްލާމިކް ބޭންކުގެ ފަރާތުން، މި އެއްބަސްވުމުގައި ސޮއިކުރެއްވީ އެ ބޭންކުގެ މެނޭޖިން ޑިރެކްޓަރ މުފައްދަލް އިދްރީސް ހުމްރީ އެވެ.

މިވަގުތުވެސް ރާއްޖޭގެ އެކި ސަރަހައްދުތަކުގައި 39 އޭޓީއެމްއެއް ބަހައްޓައިގެން އެމްއައިބީން ދަނީ ހިދުމަތް ދެމުންނެވެ. އަދި މި އެއްބަސްވުމާއެކު އިތުރު 23 އޭޓީއެމެއް 19 ރަށެއްގައި ބަހައްޓާނެ ކަމަށް އެމްއައިބީއިން ބުނެ އެެވެ. މީގެ އިތުރުންވެސް ހިދުމަތް އިތުރަށް ފުޅާކުރުމަށް އެމްއައިބީގެ އިތުރު ހިދުމަތްތަކެއް ރަށްރަށުގައި ގާއިމްކުރާނެ ކަމަށް އެމްއައިބީން ބުންޏެވެ.

އެ އެއްބަސްވުމުގައި ސޮއިކުރެއްވުމަށްފަހު މުފައްދަލް އިދުރީސް ވިދާޅުވީ އާ މަޝްރޫއުގެ ދަށުން އަންނަ އަހަރު ހަތަރު އަތޮޅެއްގެ 19 ރަށުގައި 23 އޭޓީއެމްއެއް ގާއިމު ކުރާނެ ކަމަށާއި އޭގެ ތެރޭގައި ހިމެނެނީ 22 ދިވެހި ރުފިޔާ އޭޓީއެމްގެ އިތުރުން އެއް ޑޮލަރު އޭޓީއެމް އެވެ.

އެމްއައިބީން އަންނަނީ ރާއްޖޭގެ 12 އަތޮޅެއްގެ 18 ރަށުގައި 39 އޭޓީއެމް މެދުވެރިކޮށް ހިދުމަަތް ދެމުންނެވެ. އޭގެ ތެރޭގައި ހިމެނެނީ 34 ދިވެހި ރުފިޔާ އޭޓީއެމް އަދި ފަސް ޑޮލަރު އޭޓީއެމް އެވެ.

އޭގެ އިތުރުން އެމްއައިބީގެ ހަ ބްރާންޗަކާއި ހަ ސޭލްސް ސެންޓަރުގެ އިތުރުން ހަ އޭޓީއެމް ކިއޮސްކުން އަންނަނީ އެކި ތަންތަނުގައި ހިދުމަތް ދެމުންނެވެ.

އޭޓީއެމްގެ ހިދުމަތް ފުޅާ ކުރުމަށް ކުރިއަށް ގެންދާ މަޝްރޫއު އަންނަ އަހަރު ނިމުމުން 16 އަތޮޅެއްގެ 37 ރަށެއްގައި އެމްއައިބީގެ 62 އޭޓީއެމްއަކުން ހިދުމަތް ދޭނެ އެވެ. އެއީ 56 ރުފިޔާ އޭޓީއެމް އަދި ހަ ޑޮލަރު އޭޓީއެމް އެވެ.

ޒަމާނީ ވަސީލަތްތަކުގެ އެހީގައި ބޭންކިން ހިދުމަތްތައް ދެމުން އަންނަ އެމްއައިބީން މޯބައިލް އެޕްލިކޭޝަން އަޕްގްރޭޑްކޮށް، މުޅިން އާ ހިދުމަތްތަކެއް ވެސް މިފަހުން ވަނީ ތައާރަފް ކޮށްފަ އެވެ.

ހުޅުމާލެ ސެންޓްރަލް ޕާކުގައި ހަވާ އެރުވުމާއެކު ބޭއްވި ހަފްލާއެއްގައި ދައްކާލި އެމްއައިބީގެ އާ މޯބައިލް އެޕްލިކޭޝަނުން އެކްސެސް އޮތް އެހެން އެކައުންޓްތަކަށް ސްވިޗް ކުރެވެ އެވެ.

މިގޮތުން، ފަސޭހަ ކަމާ އެކު އެޕްރޫވް ކުރަން ޖެހޭ ޓްރާންސެކްޝަންތައް އެޕްރޫވް ކުރުމުގެ އިތުރުން ކަސްޓަމަރުންނަށް ބޭނުންކޮށްލަން ފަސޭހަ ގިނަ ކަންކަން ވަނީ އެޕްގައި ހިމަނާފަ އެވެ.

އެމްއައިބީން އަލަށް ތައާރަފްކުރި "ބިންގާ ކިޑްސް އެކައުންޓް" ގެ ތެރޭގައި ތަފާތު ތިން ވައްތެރެއްގެ އެކައުންޓު ހިމެނޭ ބަންޑަލް ޕެކޭޖެއް ލިބޭނެ އެވެ.

އެ ޕޭކޭޖުގައި ކޮންމެ ކުއްޖަކަށް ވެސް ބިންގާ ޓްރާންސެކްޝަން އެކައުންޓާއި، ބިންގާ ސޭވިން އެކައުންޓުގެ އިތުރުން ބިންގާ އިންވެސްޓްމަންޓް އެކައުންޓު ވެސް ލިބޭނެ އެވެ.