20 ވަނަ ރައްޔިތުންގެ މަޖިލީހަށް އަލަށް ހޮވުނު މެމްބަރުންނަށް އިސްލާމިކް މިނިސްޓްރީން ހާއްސަ މަންދޫބެއް ހަމަޖެއްސީ ލާމަރުކަޒީ ނިޒާމަށް ވާގަވެރިވާން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
އިސްލާމިކް މިނިސްޓްރީން ބޭއްވި ނޫސްވެރިންގެ ބައްދަލުވުމަށް ފަހު އެކަމާ ގުޅޭ ގޮތުން ނޫސްވެރިޔަކު ސުވާލު ކުރުމުން މިނިސްޓާރ ޝަހީމް ވިދާޅުވީ ދާއިރާތަކާ ގުޅުން ހުރި ކަންތަކުގައި މަޖިލިސް މެމްބަރުންގެ ގިނަ ކޯލުތަކެއް މިނިސްޓަރުންނަށް ލިބޭ ކަމަށެވެ.
އެއްވެސް ހާލެއްގައި ދާއިރާގެ މީހަކު ހުކުރު ހުއްދައެއް ނަގަން އޭނާ ދާން ޖެހޭނީ އެމްޕީ ކައިރިއަކަށް ނޫން ކަމަށް ވެސް މިނިސްޓާރ ވިދާޅުވިއެވެެ.
މިނިސްޓާރ މިފަދައިން ސާފުކޮށްދެއްވާފައިވަނީ ބައެއް ފަރާތްތަކުން އެކަމަށް ފާޑުކިޔުމުންނެވެ.
އަލަށް ހޮވުނު ރައްޔިތުންގެ މަޖިލީހުގެ މެމްބަރުންގެ ހިދުމަތުގައި މަންދޫބެއްގެ ގޮތުގައި ހަމަޖައްސާފައި ވަނީ މިނިސްޓްރީގެ ސީނިއާ ޕޮލިޓިކަލް ޑިރެކްޓަރު ޔާސީން ނައީމް އެވެ.
