ޚަރަދު ކުޑަކުރަން ހުވާކުރި ރައީސް ޑރ މުއިއްޒުގެ ސަރުކާރުން ވެރިކަމާ ހަވާލުވިފަހުން ރާއްޖޭގެ އިޤްތިސާދު ދުވަހަކަށް ވުރެ ދުވަހެއް ދަށަށް ދާ ކަމަށް ޑރ މުޙައްމަދު ޖަމީލް އަހްމަދު ވިދާޅުވެއްޖެއެވެ.

ޖަމީލް މިހެން ވިދާޅުވީ ރާއްޖޭގެ އިޤްތިސާދު ކުރިއަރާނެ ކަމަށް ކުރިން ލަފާކުރިވަރު އަލުން ރިވައިސްކޮށް އެ މިންގަނޑު ވޯލްޑް ބޭންކް އިން ދަށްކުރުމާއި ގުޅިގެންނެވެ.

ޖަމީލް އެކްސް ގައި ކުރެއްވި ޕޯސްޓްގައި އިތުރަށް ވިދާޅުވެފައިވަނީ ރިޔާސީ ބަޔާނުގައި ސިޔާސީ ވަޒީފާތައް އިތުރު ނުކުރައްވާނެކަމަށް ވިދާޅުވި ނަމަވެސް މިއަދަދު ދަނީ މައްޗަށް ކަމުގައެވެ. މިވީ 06 މަސް ތެރޭގައި ރާއްޖެއިން ބޭރަށް ސަރުކާރުގެ އިސްވެރިން ކުރައްވާ ދަތުރުތައް މަދު ނުކުރެވުނު އިރު، ޤައުމަށް ބޭނުންވަނީ ފިސްކަލް ޑިސިޕްލިން ދަންނަ އިޤްތިޞާދީ ގޮތުން ނަތީޖާ ނެރެވޭނެ ޤާބިލް ވެރިއެއް ކަމަށް ޖަމީލް ފާހަގަކޮށްފައިވެއެވެ.

ވޯލްޑް ބޭންކް އިން ނެރެފައިވާ އާ ރިޕޯޓުގައި ވާ ގޮތުން ރާއްޖޭގެ އިގްތިސާދު މިއަހަރު ކުރިއަރާނީ 47 ޕަސެންޓްއެވެ. ވޯލްޑް ބެންކް އިން ބުނެފައިވަނީ ރާއްޖޭގެ އިގްތިސާދަށް އެކްސްޓާނަލް އަދި ފިސްކަލް ގޮންޖެހުންތައް އެބަހުރި ކަމަށާއި ފިސްކަލް ރިފޯމުތަކަށް އަމަލު ނުކޮށްފިނަމަ ދަރަނީގެ ނުރައްކާ ރާއްޖެއަށް ކުރުމުގެ ފުރުސަތު ބޮޑު ކަމަށެވެ.