ރައީސް މުއިއްޒު ޒުވާނުންގެ ވުޒާރާއަށް ޑެޕިއުޓީ މިނިސްޓަރުންގެ ގޮތުގައި އައްޔަންކޮށްފައި ތިއްބެވި މަލްޝާ ޝަރީފް، މަރިޔަމް ޝިއުނާގެ އިތުރުން އަބްދުﷲ މަހްޒޫމް މާޖިދުގެ ސަބަބުން އިންޑިއާގެ ފަތުރުވެރިން ރާއްޖެ އައުން މަދުވެގެން ދިޔަ ކަމަށް ފޮރިން މިނިސްޓަރު މޫސާ ޒަމީރު ވިދާޅުވެއްޖެއެވެ.

ޒަމީރު މިފަދައިން ވިދާޅުވީ، އިންޑިއާގެ ނޫހެއް ކަމަށްވާ އޭޝިއަން ނިއުސް އިންޓަނޭޝަނަލް، "އޭއެންއައި"އަށް ދެއްވި ހާއްސަ ބަސްދީގަތުމެއްގައެވެ.

އިންޑިއާ އަށާއި އެ ގައުމުގެ ބޮޑުވަޒީރު ނަރެންދުރަ މޯދީ އަށް ބަދު ބަސް ވިދާޅުވެ، ޔޫތު މިނިސްޓްރީގެ ތިން ޑެޕިއުޓީ މިނިސްޓަރަކު ދެއްކެވި ވާހަކަތަކުގެ ސަބަބުން ރާއްޖެ އަންނަ އިންޑިއާ ފަތުުރވެރިންގެ އަދަދު ދަށާށް ގޮސްފައިވާތީ އިންޑިއާ ފަތުރުވެރިން ރާއްޖެ އައުމަށް ފަތުރުވެރިކަމާ ބެހޭ ވަޒީރު އިބްރާހިމު ފައިސަލް ވަނީ އާދޭސް ވެސް ދަންނަވާފައެވެ.

އިންޑިއާގެ ލަކްޝަދީބްގައި ޓޫރިޒަމް ޕްރޮމޯޓް ކުރުމަށްޓަކައި އެ ގައުމުގެ ބޮޑޫ ވަޒީރު ނަރެންދްރަ މޯދީ އެރަށަށް ވަޑައިގެން ނެންގެވި ފޮޓޯތަކާއި ވީޑިއޯތައް ސޯޝަލްމީޑިއާގައި އާންމުކުރުމާ އެކު އިންޑިއާގެ ފަތުރުވެރިން ދެން ރާއްޖެއަށް ދިއުމުގެ ބޭނުމެއް ނެތް ކަމަށް ބުނެ އިންޑިއާ ރައްޔިތުން ޚިޔާލުފާޅުކުރުމުން، ސަރުކާރުގެ އިސް އޮފިޝަލުންގެ ތެރޭގައި ހިމެނޭ ތިން ޑެޕިއުޓީ މިނިސްޓަރުން ކަމަށްވާ ޔޫތު މިނިސްޓްރީގެ މަރިޔަމް ޝިއުނާ އާއި، މަލްޝާ ޝަރީފާ އަދި އަބްދުﷲ މަހްޒޫމް މާޖިދު ވަނީ މޯދީއަށް އަމާޒުކުރައްވާ ބޭއަދަބީ ބަސްތަކެއް ބޭނުންކޮށްފައެވެ.

އެއާއެކު އިންޑިއާގެ ގިނަ ރައްޔިތުންގެ ނުރުހުން ޝިއުނާ އާއި މަލްޝާ އަށް އަމާޒުވުމުގެ އިތުރުން، ރާއްޖެއަށާއި ދިވެހި ސަރުކާރަށް ފާޑު ވެސްކިއެވެ.

މިއާއެކު ދިވެހި ސަރުކާރު ހޫނު ފެނަށް ވެއްޓި އެތިން ވަޒީރުން ނަމެއްގައި ސަސްޕެންޑުކުރިއެވެ. ނަމަވެސް މިއި ޑިޕްލޮމެޓިކު އުސޫލަށް ބަލާއިރު އެކަން ހިނގާ ގޮތް ނޫން ކަމަށާ އެ އުސޫލަށް ބަޅާނަމަ ތިން ނައިބުން މަގާމުން ވަކިކުރަން ޖެހޭނެ ކަމަށް ޚާރިޖީ ދާއިރާގައި ތަޖުރިބާކާރުން ހާމަކޮށްފައިވެއެވެ. ނަމަވެސް ދިވެހި ސަރުކާރުން ބުނެފައިވާ ގޮތުގައި އެ ތިން ނައިބުން ފާޅުކޮށްފައިވަނީ ސަރުކާރުގެ ސްޓޭންޑު ނޫން ކަމަށެވެ. ނަމަވެސް ތިން ބޭފުޅުންނަކީ ވެސް ސަރުކާރު ތަމްސީލު ކުރައްވާ އިސް ތިން ބޭފުޅުންނަށްވާއިރު އެހެން އެކަން ހިނގައިގެން ނުވާނެ ކަމަށް ގިނަ ބަޔަކު ބުނެފައިވެއެވެ.

ޒަމީރުވަނީ އޭނާގެ ބަސްދީގަތުމުގައި ވެސް އެކަން ހަމަ އެގޮތަށް ތަކުރާރުކުރައްވާފައެވެ. އެގޮތުން ސޯޝަލް މީޑިއާގައި ބައެއް ޑެޕިއުޓީ މިނިސްޓަރުން މޯދީއަށާއި އެ ގައުމަށް ކުޑައިމީސްކޮށް ކުރި ޕޯސްޓްތަކުގެ ސަބަބުން އިންޑިއާއިން އައި ފަތުރުވެރިންގެ އަދަދު ދަށްވިއެވެ. އެކަމަކު މި ދަތުރުގެ ސަބަބުން އެކަން ރަނގަޅުވެ، އިންޑިއާ މާކެޓް ރަނގަޅުވެގެން ދާނެ ކަމަށް އުންމީދުކުރައްވާ ކަމަށް ވިދާޅުވިއެވެ.