ވޭތުވެދިޔަ ހަ އަހަރުތެރޭ ޖިންސީ ކުށުގެ މައްސަލަތަކުގެ 2،169 މައްސަލައެއް ފުލުހަށް ހުށަހަޅާފައިވާކަން ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީން އެއްކުރި މައުލޫމާތުން ހާމަވެއްޖެއެވެ.

މިހާރުގެ ލޯކަލް ގަވަނަންސް މިނިސްޓަރު އާދަމް ޝަރީފު, މަޑުއްވަރީ ދާއިރާގެ މެމްބަރުގެ ގޮތުގައި ހުންނަވާ 19 މަޖިލީހަށް ވަނީ ޖިންސީ ގޯނާކުރުމާއި ރޭޕްގެ މައްސަލަތައް އިތުުރުވެފައިވާތީއެވެ.

އެ ގަރާރު ދިރާސާ ކުރުމަށްފަހު އެކުލަވައިލި ރިޕޯޓު މިއަދުގެ މަޖިލީހުގައި ހިއުމަން ރައިޓްސް އެންޑް ޖެންޑާ ކޮމިޓީގެ މުގައްރިރު، ހިންނަވަރު ދާއިރާގެ މެންބަރު ޖީހާން މަހުމޫދު ވަނީ ހުށަހަޅާފައެވެ.

އެ ގަރާރު ދިރާސާކުރުމަށް މަޖިލީހުގެ ހިއުމަން ރައިޓްސް ކޮމިޓީން އެއްކުރި މައުލޫމާތުން އެނގުނު ގޮތުގައި ވޭތުވެދިޔަ ހަ އަހަރުތެރޭ ޖިންސީ ކުށުގެ މައްސަލަތަކުގެ 2،169 މައްސަލައެއް ފުލުހަށް ހުށަހަޅާފައިވެއެވެ.

ފުލުހުންނަށް ހުށަހެޅި މައްސަލަތަކަކުގެ އަދަދުތަކަކީ:

• 2018 ވަނަ އަހަރު 362 މައްސަލަ
  2019 ވަނަ އަހަރު 410 މައްސަލަ
  2020 ވަނަ އަހަރު 487 މައްސަލަ
  2021 ވަނަ އަހަރު 342 މައްސަލަ
  2022 ވަނަ އަހަރު 334 މައްސަލަ
  2023 ވަނަ އަހަރު 234 މައްސަލަ އެވެ.

ޖިންސީ ކުށުގެ ޤާނޫނުގެ ދަށުން ޕްރޮސެކިއުޓާ ޖެނެރަލްގެ އޮފީހުން ކޯޓުތަކަށް ޖުމުލަ 47 މައްސަލައެއް އެ މުއްދަތުގައި ހުށަހަޅާފައިވާއިރު ކޯޓުން ސާބިތުވެފައިވަނީ 10 މައްސަލައެއް ކަމަށާއި އަދި 8 މައްސަލައެއް ސާބިތުނުވާ ކަމަށް ކަނޑައަޅާފައިވާ ކަމަށް ރިޕޯޓުގައި ވަނީ ބުނެފައެވެ.

މި މައްސަލައިގައި ކޮމިޓީއަށް ފާހަގަކުރެވުނު ކަންކަމުގެ ގޮތުގައި ހައިލައިޓް ކޮށްފައިވާ ކަންތައް ތަކަށް ބަލާއިރު:

ޖިންސީ ގޯނާ ކޮށްގެން ފުލުހުންނަށް ހުށަހަޅާ ގިނަ މައްސަލަތަކަކީ ޖިންސީ ގޯނާއާ ގުޅިގެން ވަކި ކަމެއް ކުރާނެ ކަމަށް ޑިމާންޑުކޮށް ބްލެކްމެއިލްކުރާ މައްސަލަތައް.

• ޖިންސީ ގޯނާގެ މައްސަލަތަކުގައި ހެއްކާއި ގަރީނާ ނެގުމަށް ހަދަންޖެހޭ ޓެސްޓުތައް ހެދޭނެ ވަސީލަތްތައް ގިނަ ރަށްރަށުގައި ނެތުން.

• އަނިޔާ ލިބޭ ފަރާތް ދައުވާކުރަން ފޮނުވުމުގެ ކުރިން ސައިކޮލޮޖިކަލް ރިޕޯޓެއް ނެގުމަށް ބަލާއިރު، އެފަދަ ތަންތަން ރާއްޖޭގައި މަދުވުމުން އެކަށީގެންވާ އަވަސްމިނުގައި ޚިދުމަތް ނުލިބުން.

• ރޭޕް އެވިޑެންސް ކިޓް ސަރުކާރުގެ ގިނަ ސިއްހީ ޚިދުމަތްދޭ މަރުކަޒުތަކަށް ފޯރުކޮށްދީފައި ނުވާކަންވެސް ކޮމިޓީއިން ފާހަގަކޮށްފައިވެއެވެ.

މައްސަލަތަކާ ގުޅިގެން ފާހަގަކުރެވުނު ކަންކަން ރަގަޅު ކޮށް ހައްލުކުރުމަށް ކޮމިޓީއިން ހުށަހެޅި ހުށަހެޅި ހުށަހެޅުންތަކުގެ ތެރޭގައި:

• ޖިންސީ ކުށުގެ ޝިކާރައަކަށްވާ ފަރާތްތަކަށް އެހީތެރިކަން ފޯރުކޮށްދިނުމަށް، ކަމާގުޅޭ އިދާރާތަކުގެ މެދުގައި މަސައްކަތްކުރާނެ ހަރުދަނާ ނިޒާމެއް ގާއިމުކުރުން.

• ޖިންސީ ކުށުގެ މައްސަލަތަކުގެ ތަހުގީގު އަވަސްކުރުމަށާއި، އެފަދަ ކުށްތަކުގެ ޝިކާރައަކަށްވާ ފަރާތްތަކަށް ބޭނުންވާ ނަފްސާނީ އެހީތެރިކަން ފޯރުކޮށްދިނުމަށް ޓަކައި އެ ފަދަ ޚިދުމަތްތައް ލިބޭނެ ގޮތްތައް ގާއިމުކުރުން.

• ރޭޕް އެވިޑެންސް ކިޓް ބޭނުންކުރުން ލާޒިމުކުރުމާއި، އެ ކިޓް ބޭނުންކުރުމާ ގުޅޭ އުސޫލުތައް ހެދުން.

• ޖިންސީ ކުށުގެ ގާނޫނަށް ގެނެވުނު ފުރަތަމަ އިސްލާހުގެ ދަށުން އެކުލަވާލަންޖެހޭ ގަވާއިދުތައް އެކުލަވައިލާ، ސަރުކާރުގެ ފަރާތުން ފޯރުކޮށްދޭންޖެހޭ ރޭޕް އެވިޑެންސް ކިޓް 2024ވަނަ އަހަރު ނިމުމުގެ ކުރިން ސަރުކާރުގެ ހުރިހާ ސިއްހީ ޚިދުމަތްދޭ މަރުކަޒުތަކަށް ފޯރުކޮށްދިނުން ހިމެނެއެވެ.

މައްސަލަތައް ކޯޓު މަރުހަލާގައާއި އަދި އެ ނޫން ވެސް މަރުހަލާތަކުގައި އެތައް ދުވަހެއް ހޭދަވާކަމުން މަޖިލީހުގެ ހިއުމަން ރައިޓްސް ކޮމިޓީން ވަނީ ކަންބޮޑުވުން ފާހަގަކުރައްވާފައެވެ.