އާސަންދަ ހެލްތު އިންޝުއަރެންސް ސްކީމަށް މިއަހަރުގެ ފުރަތަމަ ކުއާޓަރުގެ ތެރޭގައި ކުރި ހަރަދު ފަސް ޕަސެންޓުން އިތުރުވެއްޖެއެވެ.

އާސަންދައިން ހާމަކުރި ތަފާސްހިސާބުތަކުން ދައްކާ ގޮތުގައި މިއަހަރުގެ ފުރަތަމަ ތިން މަސް ދުވަހުގެ ތެރޭގައި 838 މިލިއަން ރުފިޔާ ވަނީ އެ ސްކީމަށް ހަރަދުކޮށްފަ އެވެ.

މިދިޔަ އަހަރުގެ އެ މުއްދަތުގައި އާސަންދައަށް ހަރަދުކުރީ 799 މިލިއަން ރުފިޔާކަން ފާހަގަކޮށްލެވެއެވެ.

މިއީ 4.8 ޕަސެންޓު އިތުރު އަދަދެކެވެ.

ހަރަދު އިތުރުވިއިރު އާސަންދަ ބޭނުންކުރި މީހުންގެ އަދަދު ވެސް މިދިޔަ އަހަރާ އަޅާބަލާއިރު ވަނީ އިތުރުވެފަ އެވެ.

އެގޮތުން 276،439 މީހުން އާސަންދަ ހެލްތު އިންޝުއަރެންސް ފުރަތަމަ ކުއާޓަރުގައި ހޯދިއިރު އެއީ މިދިޔަ އަހަރުގެ އެ މުއްދަތަށް ވުރެ 3,005 މީހުން އިތުރު އަދަދެއްކަން ވަނީ ފާހަގަވެފައެވެ.

އޭގެ ތެރޭގައި އިމަޖެންސީ ހާލަތުގައި އެއް ރަށުން އަނެއް ރަށަށް 1,599 މީހުން ގެންދިޔައިރު ފަރުވާއަށް ރާއްޖެއިން ބޭރަށް 1,699 މީހުން ގެންދިޔަކަން ވެސް ވަނީ ހާމަވެފައެވެ.

މި ސަރުކާރުން ރިފޯމު ކުރަން ވައުދުވި އާސަންދައިގެ ހަރަދުތައް ފަސް ޕަސެންޓު އިތުރުވެފައިވުމުން ދޭހަވެގެންދަނީ ރައްޔިތުންނަށް އޮޅުވާލި މަންޒަރުކަމަށް ގިނަ ފަރާތްތަކުން އަންނަނީ ބުނަމުންނެވެ.