ރައްޔިތުން އަޅުވެތި ކުރުވޭނެ ހުރިހާ ގޮތެއް ހެދޭތޯ ސަރުކާރުން ގަދައަޅައި މަސައްކަތް ކުރާތަން ފެންނަމުން ދާ ކަމަށް ރާއްޖެއިން އިންޑިއާއަށް ކުރިން ކަނޑައަޅުއްވާފައި ހުންނެވި ކޮންސިއުލް އަލީ އާދަމް ވިދާޅުވެއްޖެއެވެ.
ބޭނުން ޖެހިފައިވާ މީހުންނަށް އެކަނި އާސަންދަ ދިނުމަށް އޮޑިޓަރ ޖެނެރަލް ސަރުކާރަށް ލަފާދިންކަމަށް ބުނާ ޚަބަރެއްގެ ސްކްރީން ޝޮޓެއް ހިއްސާ ކުރައްވާ އިސްލާމިކު މިނިސްޓްރީގެ ކުރީގެ ނައިބުކަން ވެސް ކުރައްވާފައިވާ އަލީ ވިދާޅުވީ، ތަންކޮޅެއް ކުރީގައި އެބުނާ ބޭނުން ޖެހިފައި ވާމީހުން ކަނޑަ އަޅަނީ ދެ ގެއެއްގެ ދޮރާށި މުއްގަނޑުގައި ހިފުމުން ކަމަށާ އަދި ރަށް ރަށުގައި ހެދިފައި ހުންނަ ރުއްތަކާއި ގަސް ގަސް ތަޅާލައިގެން ގޯނިފުރާ އެގޭގެއަށް ގެންގޮސްގެން ކަމަށެވެ.
އެހެންކަމުން މިހާރު އެގޮތަށް ކަނޑަ އެޅިއްޖެނަމަ، ސަރުކާރުގެ ވެރިޔެއް ކަމަށް ގަބޫލުކުރެވޭ ކޮންމެ މީހެއްގެ ގޭދޮރާށި ގޮބުގައި ހިދާ އނެބުރުގެ އިތުރުން އެ ގޭގައި ފެންފޮތިވެސް ލާން ޖެހޭނެ ކަމަށާ ބޭނުން ޖެހިފަ ތިބި މީހުން ކަނޑައެޅޭނީ އޭރުން ކަމަށް ވިދާޅުވެ އަލީ އަޅުވެތި ކުރުވޭނެ ހުރިހާ ގޮތެއް ހެދޭތޯ ގަދައަޅައި ސަރުކާރުން މަސައްކަތް ކުރާތަން ފެންނަމުން ދާ ކަމަށެވެ.
ކަންކަން ތަރުތީބު މަގުން ކައްސާލާ ނުކިސިޔާރުކޮށް ދަތުރު ކުރަމުންދާއިރު ރައްޔިތުން އެކަންކަމާ މެދު ބަހެއް ބުނާނީ ކޮންދުވަހަކުން ކަމާ މެދު ސުވާލު އުފައްދަވާ އަލީ ވަނީ އާސަންދަ ގާއިމު ކުރި ފަހުން މިހާތަނަށް ދިވެހި ކޮންމެ މީހަކަށް ވެސް އޭގެ އެހީތެރިކަން ލިބިދިންކަމަށާ އެކަން ގާއިމުކުރި އިރު ގައުމަށް ލިބޭ ފައިސާއަށް ވުރެ މިހާރު ފައިސާ ލިބޭލެ މިންވަރުވެސް ގިނަ ވާހަކަ އަދި އަންނަ ޓުއަރިސްޓުންގެ އަދަދުވެސް ގިނަ ވާހަކަ އަދި އެޓުއަރިސްޓުން ގެންނަ ޑޮލަރު ގިނަ ވާހަކަ މޭމަތީ އަތްޖަހާފަ މައިކެއް އަތުޖެހިއްޖެ ނަމަ ކޮންމެ މީހަކު ވެސް އަނގަ ތަންމިނަށް ފުޅާކޮށްފަ ބުނާތީ އަޑު އިވޭ ކަމަށް ވިދާޅުވެފައެވެ.
އެހެންކަމުން ދައުލަތަށް ވަންނަ ފައިސާ އެބުނާ މިންވަރަށް އިތުރުވެފައިވާ ނަމަ ކުރިން އާސަންދައިގެ ޚިދުމަތް ރައްޔިތުންނަށް ފޯރުކޮށްދެވުނުއިރު މިހާރު ރައްޔިތުންނަށް އެ ހިދުމަތް ނުދެވެނީ ކާރިސާއެއް އައިސް ގެންތޯ އައްސަވާ އަލީ ވަނީ ސުވާލެއް އަމާޒުކުރައްވާފައެވެ. އަލީ ވިދާޅުވެފައިވާ ގޮތުގައި އެކަންކަން ނުކުރެވެނީ ފައިސާގެ ދަތިކަމެއް އައިސްގެން ނޫން ކަމަށާ އެކަންކަން ނުކުރެވެނީ ކަން ކުރަން ތިބި މީހުންގެ ގާބިލުކަން ނެތުމުން ކަމަށެވެ.
ދިވެހި ހަރު ބަހެއް ހަނދާނަށް ގެންނަވާ އަލީ ވިދާޅުވެފައިވަނީ އަމިއްލަ ބާލީހަށް ބަންޑާރަ ކަފަ ލައްވާ ވާހަކަ އަޑު އަހާ ކަމަށާ މިއަދު ފެންނަނީ ރައްޔިތުން އަސާސީ ހައްގުން މަހުރޫމުކޮށް، ވެރިންގެ ފައިކޭޓުތައް ފުން ކުރާ މަންޒަރު ކަމަށެވެ.
އެހެންކަމުން ރައްޔިތުން ލައްވާ ސަލާން ޖައްސަން މަގު ނުކޮށާ އެ ރައްޔިތުން އަޅުވެތި ނުކުރުވާ، ރައްޔިތުންނަށް މީގެ ކުރިންވެސް ހިދުމަތް ދިން ފަދައިން އެބާވަތުގެ ހިދުމަތް ދެވޭވަރުގެ ބަޔަކާ ހަވާލުކޮށްފައި އަދުވެ ވެރިން ގެއަށް ވަޑައިގަތުމަށް އަލީ ވަނީ ގޮވާލައްވާފައެވެ.
