ރައްޔިތުންގެ މަޖިލީހުގެ އިންތިޚާބަށް ކުރިމަތިލުމަށް އެދޭ ފަރާތްތަކުން އިންތިޚާބަށް ޚާއްސަކޮށްގެން ބޭންކް އެކައުންޓެއް ހުޅުވަންޖެހޭނެ ކަމަށް އިލެކްޝަންސް ކޮމިޝަން (އީސީ) އިން އެދިއްޖެއެވެ.

އީސީގެ އެކްސް ހޭންޑަލްގައި ކުރި އިއުލާނެއްގައި ބުނެފައިވަނީ އަންނަ މާޗު 17 ވާ އާދީއްތަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބަށް ކުރިމަތިލުމުގެ ފުރުސަތު ޖަނަވަރީ 31 ވާ ބުދަ ދުވަހުން ފެށިގެން ފެބުރުވަރީ 14 ވާ ބުދަ ދުވަހުގެ ނިޔަލަށް ހުޅުވައިލުމަށް ނިންމާފައިވާ ކަމަށެވެ.

އިންތިޚާބަށް ކުރިމަތިލުމަށް އެދޭ ފަރާތްތަކުން އިންތިޚާބަށް ކުރިމަތިލުމަށް އެދި ހުށަހަޅަންޖެހޭ ތަކެތީގެ ތެރޭގައި ހިމެނޭ ކުށާއި ދަރަނީގެ ރެކޯޑު ފޯމާއި، އިންތިޚާބަށް ޚާއްސަކޮށްގެން ހުޅުވާ ބޭންކް އެކައުންޓް ހުޅުވުމުގެ ފުރުސަތު ކެންޑިޑޭޓުންނަށް ފަސޭހަކުރުމުގެ ގޮތުން، ދުރާލައި ދިނުމަށް ކޮމިޝަނުން ބޭނުންވާކަމަށް ވެސް އެ އިއުލާނުގައި ބުނެފައިވެއެވެ.

އީސީއިން ބުނީ މިދިޔަ ޑިސެންބަރު މަހުގެ 14 ގެ ފަހުން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުންނާއި، މޯލްޑިވްސް ކަރެކްޝަނަލް ސަރވިސަސް އިން ފުރިހަމަކޮށްފައިވާ، މަޖިލީހުގެ އިންތިޚާބަށް ކުރިމަތިލާން އެދޭ މީހާއާއި އޭނާގެ ރަސްމީ އިންތިޚާބީ އޭޖެންޓްގެ ކުށާއި ދަރަނީގެ ރެކޯޑު ސާފުކުރި ފޯމު ބަލައިގަތުމަށް ކޮމިޝަނުންވަނީ ނިންމާފައި ކަމަށެވެ.

އެގޮތުން އިންތިޚާބަށް ކުރިމަތިލުމަށް އެދޭ ފަރާތްތަކުން ކުށާއި ދަރަނީގެ ރެކޯޑު ދުރާލައި ސާފުކުރުމުގެ ކަންކަން ކުރިޔަށް ގެންދިޔުމަށާއި، އިންތިޚާބަށް ކުރިމަތިލުމަށް އެދޭ މީހުން އިންތިޚާބަށް ޚާއްސަ ބޭންކް އެކައުންޓް ހުޅުވުމުގެ ކަންކަން މިއަދުން ފެށިގެން ކުރިޔަށް ގެންދިޔުމަށް އީސީއިން ވަނީ އެދިފައެވެ.

އީސީއިން ހާމަކުރި ގޮތުގައި ރަސްމީ އިންތިޚާބީ އޭޖެންޓް މޯލްޑިވްސް ކަރެކްޝަނަލް ސަރވިސަސް އިން ކުށުގެ ރެކޯޑު ސާފުކުރާކަށް ނުޖެހޭނެއެވެ.

ރައްޔިތުންގެ މަޖިލީހުގެ އިންތިހާބު މާޗް މަހުގެ 17 ގައި ބޭއްވުމަށް ހަަމަޖެހިފައިވާ އިރު އެއީ ރަމަޟާން މަހުގެ 7 ވަނަ ދުވަސްކަން ފާހަގަކޮށްލެވެއެވެ.