ސަރުކާރުގެ ވެރިން ފަރސްޓު ކްލާހުގައި ދަތުރު ނުކުރައްވާނެ ކަމަށް ރައީސް އޮފީހުން މީގެ ކުރިން ވިދާޅުވި ނަމަވެސް ނައިބު ރައީސް ދެވަނަ ފަހަރަށް ފަރސްޓު ކްލާހުގައި ދަތުރުކުރައްވައިފިއެވެ.

ނައިބު ރައީސް ހުސެއިން މުހައްމަދު ލަތީފު ފަރސްޓު ކްލާހުގައި މިފަހަރު ދަތުރުފުޅު ފެއްޓެވީ ޔުގަންޑާއަށެވެ.

ރައީސް އޮފީހުން ހާމަކޮށްފައިވާ މައުލޫމާތަށް ބަލާއިރު، ރައީސުލްޖުމްހޫރިއްޔާގެ ނައިބުގެ މި ދަތުރުފުޅުގައި ޔުގަންޑާގެ ކަމްޕާލާގައި ބާއްވާ ނޮން-އެލައިންޑް މޫވްމަންޓް (ނާމް)ގެ 19 ވަނަ ސަމިޓުގެ ޤައުމުތަކުގެ އިސްވެރިންގެ ބައްދަލުވުމުގައާއި ”ގްރޫޕް އޮފް 77 އެންޑް ޗައިނާ“ (ޖީ77) ގެ ދަށުން ބާއްވާ ތިންވަނަ ސައުތް ސަމިޓްގައި ބައިވެރިވެވަޑައިގަންނަވާނެއެވެ.

މި ދެސަމިޓުގައި ވެސް ރައީސުލްޖުމްހޫރިއްޔާގެ ނައިބު ތަޤްރީރުކުރެއްވުމަށް ހަމަޖެހިފައިވާކަމަށްވެސް ރައީސް އޮފީހުން ހާމަކޮށްފައިވެއެވެ.

ރާއްޖޭގެ ބައެއް މީޑިޔާތަކުގައި ހާމަކޮށްފައިވާ ގޮތުގައި ނައިބު ރައީސް ޔުގަންޑާއަށް ފުރާވަޑައިގަތީ އެމިރޭޓްސް އެއަރލައިންގެ ފަސްޓު ކުލާހުގައި، ދައުލަތުގެ ޚަރަދުގައެވެ. އަދި އެނބުރި ވަޑައިގަތުމަށް ހަމަޖެހިފައިވަނީ ވެސް އެމިރޭޓްސް އެއަރލައިންގެ ފަސްޓު ކްލާހުގައެވެ.

އެމިރޭޓްސްގެ ފަސްޓު ކްލާހަކީ ދުނިޔޭގެ އެއަރަލއިންތަކުގެ ތެރެއިން އެންމެ އަގުބޮޑު ކްލާސްކަން ފާހަގަ ކޮށްލެވެއެވެ. އެގޮތުން އެމިރޭޓްސް އެއަރލައިންގެ ފަސްޓު ކްލާހުގެ ޓިކެޓްގެ އަގު އާންމު ގޮތެއްގައި އުޅެނީ 12 ހާސް އެމެރިކާ ޑޮލަރަށްވުރެ މަތީގައެވެ.