ޓެކްސް ފައިސާ އިން ހިންގާ ދައުލަތުގެ މީޑިޔާ، ޕީއެސްއެމް އިން ޕްރައިވެޓް މީޑިޔާތަކަށް ދެމުން އައި ފީޑް ނުދިނުމަށް ޕީއެސްއެމްގެ މެނޭޖިންގ ޑިރެކްޓާރ ޒީނާ ޒާހިރު އަންގައިފިއެވެ.

ޒީނާ މިފަދައިން ފީޑް ނުދިނުމަށް ނިންމާފައިވާއިރު، ލައިވް ފީޑް ދޫކުރުމަށް ޕީއެސްއެމް އަށް އެއްވެސް ހަރަދެއް ނުހިނގާނެއެވެ.ފީޑް ދޫކުރަނީ ޕީއެސްއެމް އަށް ޕްރައިވެޓް ބްރޯޑްކާސްޓަރުން އަމިއްލަ ޚަރަދުގައި އަޅާފައިވާ ފައިބާރ ކޭބަލްތައް މެދުވެރިކޮށެވެ.

ސަރުކާރު އިވެންޓްތަކުގެ ފީޑް މީގެ ކުރިން ދެމުން އައީ ޕީއެސްއެމް އިންކަން ފާހަގަކޮށްލެވެއެވެ.

ޕްރައިވެޓް މީޑިޔާތަކަށް އިތުރު އެއްވެސް އިވެންޓެއްގެ ފީޑް ނުދެވޭނެ ކަމަށް އެންގި ނަމަވެސް ރައީސް އޮފީހުގައި ބޭއްވޭ ނޫސްވެރިންގެ ބައްދަލުވުންތަކުގެ ފީޑް ދޭނެކަމަށް ޒީނާ ވަނީ ވިދާޅުވެފައެވެ.

ޒީނާ މިފަދަ ނިންމުމެއް ނިންމާފައިވާއިރު، މިއީ މީގެ ކުރީގެ އެއްވެސް ވެރިކަމެއްގައި ކަން ހިނގާފައިވާގޮތެއް ނޫނެވެ.

ޒީނާ ޕީއެސްެއެމްއާ ހަވާލުވި ފަހުން، މުޅި ޕީއެސްއެމްގެ މެނޭޖްމަންޓް އާއި ބޯޑަށް ބިރު ދައްކާކަމަށް ވެސް ޕީއެސްއެމްގައި ގިނަ ދުވަސްވީ މުވައްޒަފެއް ވަނީ ނަން ހާމަނުކުރުމަށް ޝަރުތުކޮށް ތޭރަ އޮންލައިން އަށް ކިޔާދީފައެވެ.

އެގޮތުން އެ ފަރާތުން ބުނީ ޕީއެސްއެމްގެ ޑީއެމްޑީ ޔާމީންވެސް ހުންނަނީ ޒީނާގެ ދަށުކޮށްލާފައިކަމަށެވެ.

އަދި މެނޭޖްމަންޓް ލެވެލްގެ ފަރާތްތަކުން ބުނާ ގޮަތް ޒީނާ އެއްވެސް ވަރަކަށް ނުހަދާކަމަށް ވެސް އެ ފަރާތުން ވަނީ ބުނެފައެވެ.

ޒީނާ އަކީ ބްރޯޑްކާސްޓް ދާއިރާގައި ޓެކްނިކަލް ނޮލެޖް އެއްވެސް ވަރަކަށް ހުރި ބޭފުޅެއް ނޫނެވެ. އަދި ޓީވީ ސްޓޭޝަން އެއް ހިންގުމުގެ ތަޖުރިބާ ވެސް އެއްްވެސް ވަރަކަށް ހުރި ފަރާތެއް ނޫންކަން ފާހަގަކޮށްލެވެއެވެ.

މީޑިޔާ ވިލެޖެއް ހަދާ ދައުލަތުގެ މީޑިޔާގެ ސްޓޫޑިޔޯ އަދި އެހެނިހެން ރިސޯސްތައް ޕްރައިވެޓް މީޑިޔާތަކަށް ބޭނުން ކުރެވޭނެ އިންތިޒާމް ފަހިކޮށްދެއްވާނެ ކަމަށް ރައީސް ޑރ މުހައްމަދު މުއިއްޒު ވިދާޅުވި ނަމަވެސް މިހާރު ފެނިގެން މިދިޔައީ ކޮންޓެންޓް ވެސް ޕްރައިވެޓް މީޑިޔާތަކަށް ނުދީ ހިފަހައްޓާ މަންޒަރެވެ.