ޓެކްސް ފައިސާ އިން ހިންގާ ޕީއެސްއެމް އިން ޕްރައިވެޓް މީޑިޔާތަކަށް ދެމުން އަންނަ ފީޑް ދިނުން ހުއްޓާލުމަށް ޕީއެސްއެމްގެ އެމްޑީ ޒީނާ ޒާހިރު އެންގި ނަމަވެސް އެކަން އެގޮތައް ނުކުރާނެ ކަމަށް ސަރުކާރުން ބުނެފިއެވެ.
ޒީނާ ޕްރައިވެޓް މީޑިޔާތަކަށް ދެމުން އަންނަ ފީޑް ނުދޭނެ ކަމަށް ބުނުމުން އެކަން ކުރައްވާނީ އެގޮތައްތޯ ރައީސް އޮފީހުގެ އިސް ތަރުޖަމާނު ހީނާ ވަލީދާ ޗެނަލް 13 އިން ވަނީ ސުވާލުކޮށްފައެވެ.
ޖަވާބުގައި ހީނާ ވިދާޅުވީ ޒީނާ އެފަދައިން ވިދާޅުވި ވާހަކައަށް ޖަވާބު ދޭން އެނގިވަޑައިގަންނަވާނީ ޒީނާއަށް ކަމަށެވެ. ނަމަވެސް ސަރުކާރުން ބާއްވާ ޕްރެސްތަކުގެ ފީޑް ޕީއެސްއެމް މެދުވެރިކޮށް ހުރިހާ ޗެނަލްތަކަށް ލިބޭނެކަމަށެވެ.
ޕްރައިވެޓް މީޑިޔާތަކަށް އިތުރު އެއްވެސް އިވެންޓެއްގެ ފީޑް ނުދެވޭނެ ކަމަށް އެންގި ނަމަވެސް ރައީސް އޮފީހުގައި ބޭއްވޭ ނޫސްވެރިންގެ ބައްދަލުވުންތަކުގެ ފީޑް ދޭނެކަމަށް ޒީނާ ވަނީ ވިދާޅުވެފައެވެ.
ޒީނާ މިފަދަ ނިންމުމެއް ނިންމާފައިވާއިރު، މިއީ މީގެ ކުރީގެ އެއްވެސް ވެރިކަމެއްގައި ކަން ހިނގާފައިވާގޮތެއް ނޫނެވެ.
ޒީނާ އަކީ ބްރޯޑްކާސްޓް ދާއިރާގައި ޓެކްނިކަލް ނޮލެޖް އެއްވެސް ވަރަކަށް ހުރި ބޭފުޅެއް ނޫނެވެ. އަދި ޓީވީ ސްޓޭޝަން އެއް ހިންގުމުގެ ތަޖުރިބާ ވެސް އެއްްވެސް ވަރަކަށް ހުރި ފަރާތެއް ނޫންކަން ފާހަގަކޮށްލެވެއެވެ.
