ދިވެހިރާއްޖެއާއި އިންޑިއާ ދެމެދު މިނިވަން ވިޔަފާރީގެ އާ އެއްބަސްވުމެއް ގާއިމުކުރުމުގެ މަސައްކަތް ކުރަމުންދާ ކަމަށް އިކޮނޮމިކް މިނިސްޓަރު މުހައްމަދު ސައީދު ހާމަކުރައްވައިފިއެވެ.
މިނިސްޓަރު ހާމަކުރައްވާފައިވާ ގޮތުގައި މި އެއްބަސްވުމުން ކުރިއަށް ގެންދިޔުމުގެ މަޝްވަރާ އިސްވެ ކުރައްވާފައިވަނީ އިންޑިޔާ އިންނެވެ.
އިންޑިޔާ ސިފައިން ދިވެހިރާއްޖެއިން ފޮނުވާލެވިފައިވާ ކަމަށް މެއި 10 ވަނަ ދުވަހު ސަރުކާރުން ހާމަކުރައްވި ފަހުން އިންޑިޔާ އެކުގައި ދަނީ ގިނަ އެއްބަސްވުންތަކުގައި ސޮއި ކޮށް މަޝްވަރާ ކުރަމުންނެވެ.
އިންޑިޔާ އަށް ދިވެހިން ބަރޯސާވުން ހުއްޓާލަންޖެހޭ ކަމަށް ބުނެ ވެރިކަމަށް އައި ފަހުން އެންމެ ގިނަ މަޝްވަރާތައްވެސް ކުރެވިފައިވަނީ ހަމަ އެ ބަޔެއް ރާއްޖެއިން ފުހެލަން މަސައްކަތް ކުރާ އިންޑިޔާ ސަރުކާރާއިއެވެ.
އިންޑިޔާ ސިފައިން ފޮނުވާލައިފައިވާ ކަމަށް ބުނެ ރައްޔިތުން މޮޔަ ހައްދާފައިވާއިރު، ސަރުކާރުން ރައްޔިތުންނަށް އޮޅުވާލާ އޮޅުވާލުންތައް ދަނީ ހާމަވަމުންނެވެ.
