ކޮންމެ އިންތިޚާބަކާއި ދިމާކޮށް ފެންނަ އެންމެ އާންމު މަންޒަރަކީ ރާއްޖޭގައި ހަރަކާތްތެރިވާ ދީނީ އިލްމުވެރިން ނުވަތަ ސަލަފް ޖަމިއްޔާ އެބަޔެއްގެ ފަހަތަށް ގެނައުމެވެ. ދީނުގެ ނަމުގައި ރައްޔިތުން މޮޔަ ހެއްދުމަށްފަހު ވެރިކަމަށް އައި ޑރ މުއިއްޒުގެ ސަރުކާރުން އޭރު ދެއްކި ވާހަކަތަކާއި މިހާރު އަމަލުކުރަމުންދާ ގޮތް ހާސް ތަފާތެވެ.

ފަލަސްތީނަކީ ދިވެހިންގެ ހިތުގެ އެއްބައި ކަމަށް ބުނަމުން އައި އިރު، ފަލަސްތީނުގެ ރައްޔިތުންނާއި ދެކޮޅަށް ލާއިންސާނީ އަމަލުތައްދެމުންދާ އިޒްރޭލާއި ދެކޮޅަށް އެއްވެސް ފިޔަވަޅެއް އަޅަން މި ސަރުކާރަށް ކެރިވަޑައިނުގަތެވެ. ސަރުކާރަށް 6 މަސް ވެގެން ދިޔައިރު އިޒްރޭލް ޕާސްޕޯޓުން ރާއްޖެ އެތެރެވުން މަނާކުރުމަށް ދިވެހި ސަރުކާރުން ވަނީ ނުކުޅެދިފައެވެ.

 މީގެ އިތުރުން، ބޮސްނިއާގެ ގަތުލުއާންމު ބައިނަލްއަޤްވާމީ ގޮތުން ފާހަގަކުރުމަށް ނެގި ވޯޓުގައި ރާއްޖެއިން ވަކި ކޮޅަކަށް ވޯޓު ދޭން ނުފެންނަކަމަށް ވަނީ ނިންމާފައެވެ.

ކަން މިހެން ހުރިއިރު، ދީނުގެ ނަމުގައި އަޑުއުފުލަމުންދާ ސަލަފުގެ މެންބަރުން ހަނު ތިއްބެވުމުން ހަގީގަތުގައިވެސް މި ފަރާތްތަކުން އިސްލާމްދީން ރާއްޖޭގައި ނަގަހައްޓަން މަސައްކަތް ކުރަމުންދާ ކަމާއިމެދު ޝައްކެވެ. މި ޖަމިއްޔާގައި ހަރަކާތްތެރިވާ އިސްފަރާތްތަކަކީ ސޯޝަލް މީޑިއާގައި ދީނީ ކަންކަމުގައި އަޑުއުފުލާ، ޝުޢޫރު ފާޅުކުރާ ފަރާތްތަކަށްވާއިރު، ސަރުކާރާއި ގުޅުން ހުރި ކަންކަމުގައި އަޑު އުފުލަން މި ފަރާތްތަކުން ނުކެރޭކަން ވަނީ ފާހަގަކުރެވިފައެވެ.

ޑރ މުއިއްޒު ދައްކަވަމުންދާ އިސްލާމްދީނާއި ދެކޮޅު ސިޔާސަތުތަކަށް މި ފަރާތްތަކުން ޣާފިލުވެ ނުވަތަ ސިޔާސީ މަންފާއަށް ދީން ވިއްކާލާފައިވާކަމަށް ގިން ފަރާތްތަކުން ދަނީ ބުނަމުންނެވެ.