ރ. އުނގޫފާރުގައި ކަރަންޓު ލީކުވެ ކުދިންތަކެއް ކަރަންޓުގައި ޖެހުމުގެ ސަބަބުން،މުޅި ރާއްޖޭގައި އިންސްޕެކްޝަނެއް ހަަދަން ފެނަކަ ކޯޕަރޭޝަނުން ފަށައިފިއެވެ.
ތޭރަ އޮންލައިންނަށް މައުލޫމާތު ދެމުން ފެނަކައިގެ މެނޭޖިން ޑިރެކްޓަރު މުއާޒް މުހައްމަދު ރަޝީދު ވިދާޅުވީ އިންސްޕެކްޝަން ހަދަން ފަށަން ނިންމީ އުނގޫފާރުގައި ކުދިންތަކެއް ކަރަންޓު ޖެހުމުގެ ހާދިސާ އާއި ގުޅިގެންކަމަށެވެ.
މުއާޒް އިތުރަށް ވިދާޅުވީ އިންސްޕެކްޝަންގައި ހޮޅިދަނޑިތަކުގައި ކަރަންޓުގެ މިފަދަ މައްސަލައެއް ހުރިތޯ ބަލައި އާތު ލީކޭޖް ސާކިޓް ބްރޭކާ (އީއެލްސީބީ) ހަރުކޮށްފައި ހުރިތޯ ބަލާނެ ކަމަށެވެ.
މި ހަފްތާ ތެރޭގައި އިންސްޕެކްޝަން ނިމޭނެކަމަށް މުއާޒް ވަނީ ފާހަގަކުރައްވާފައެވެ.
މުއާޒް ވިދާޅުވީ އިންސްޕެކްޝަން ހެދުމަށްފަހު ފާހަގަކުރެވޭ ތަންތަން ވަކި މުއްދަތެއްގެ ތެރޭގައި ރަނގަޅު ކުރުމަށް ކައުންސިލްތަކަށް އަންގާނެ ކަމަށެވެ. އެ މުއްދަތުގައި ކައުންސިލްތަކުން އެކަން ނުކޮށްފިނަމަ ކަރަންޓުގެ ހިދުމަތް އެތަނަކަށް މެދުކަނޑާލާނެ ކަމަށް ވެސް މުއާޒް ވަނީ ވިދާޅުވެފައެވެ.
ދާދިފަހުން އުނގޫފާރުގައި ހިނގި ހާދިސާގައި ކަރަންޓުގައި ކުދިންތަކެއް ވަނީ ޖެހިފައެވެ.
އޭގެ ތެރެއިން ކަރަންޓްގައި ޖެހުނު ކުއްޖާއަށް ފަރުވާ ދިނުމަށްފަހު ދޫކޮށްލާފައިވާއިރު ކަރަންޓްގައި ޖެހުނު ކުއްޖާ ސަލާމަތް ކުރުމަށް އުޅުނު 18 އަހަރުގެ ޒުވާނާ ވަނީ އިތުރު ފަރުވާއަށް މާލެ ގެނެސްފައެވެ. އަދި އެ ޒުވާނާގެ ހާލު ސީރިއަސްކަމަށް ވެސް މައުލޫމާތު ލިބިފައިވެއެވެ.
