ފުވައްމުލަކުގެ ބައެއް ގެތަކަށް "ކިލާ" ފެން ލިބޭތީ އެ ސިޓީގެ ރައްޔިތުން އެކަމުގެ ޝަކުވާކުރަން ފަށައިފިއެވެ.
ފުވައްމަލުގައި ފެނަކަ އިން ދޫކުރާ ސަޕްލައި ފެން ތަޣައްޔަރުވެ ބޭނުން ނުކުރެވޭ ހާލަތަށް ދިއުމުން މިދިޔަ ހޯމަ ދުވަހުން ފެށިގެން މުޅި ރަށުން ވަނީ ފެން ކަނޑާލައިފަ އެވެ.
އެމްއެފްޑީއޭއިން ބުނީ ފެނުގެ ޓެސްޓު ހެދީ އެކި ސަރަހައްދުތަކުން ފެން ނަގައިގެން ކަމަށެވެ. އަދި އެ ތަހުލީލުތަކުން އެއީ ސިއްހަތާ ބެހޭ ޖަމިއްޔާގެ ބޯ ފެނުގެ މިންގަނޑަށް ފެތޭ ފެނެއް ކަމަށް އެ އޮތޯރިޓީން ބުނެފައިވެއެވެ.
ފެން ނުލިބޭތީ އެ ސިޓީގެ ރައްޔިތުން ވަނީ މުޒާހަރާވެސް ކޮށްފައެވެ. އެގޮތުން މުޒާހަރާ ކުރަން ފެށުމުން ފެން ދޫކުރި ނަމަވެސް ތޭރައޮންލައިނަށް މައުލޫމާތު ލިބުނު ގޮތުގައި ފުވައްމުލަކުގެ ބައެއް ގޭތަކަށް ލިބެނީ ކިލާ ފެނެވެ.
އެ ފެނުގައި ވަހެއް ހުންނަކަމަށާއި ކުލައަށް ވެސް ބަދަލު އައިސްފައިވާކަމަށް މައުލޫމާތު ދިން ފަރާތުން ވަނީ ބުނެފައެވެ.
މިފަދަ އަސާސީ ހިދުމަތްތައް ދިނުމުގައި މި ސަރުކާރުން ނުކުޅެދިފައިވާކަމަށް ބުނެ އެ ރަށު ރައްޔިތުން އަންނަނީ ސަރުކާރަށް ފާޑުކިޔަމުންނެވެ.
