20 ވަނަ ރައްޔިތުންގެ މަޖިލީހުގެ ރައީސްކަމަށް އަދުރޭ ހަމަޖެހުމާއެކު، މިއީ މިހާތަނަށް ފެންވަރާއި އަޚްލާގުދަށް ރައީސަކު މަޖިލިސް ކުރިއަށް ގެންދާ ފުރަތަމަ ފަހަރުކަމަށް ވިދާޅުވެ ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ފާޑުވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ. އެގޮތުން އެ ޕޯސްޓްގައި އެމަނިކުފާނު ވަނީ 20 ވަނަ ރައްޔިތުންގެ މަޖިލިސް މެމްބަރުންނަށް މަރުޚަބާ ދަންނަވާފައެވެ.

މިފަހަރުވެސް ގައުމުގެ ރައީސް ޑރ މުހައްމަދު މުއިއްޒު ބޭނުންވި މެޖޯރިޓީ ރައްޔިތުން މިވަނީ ދީފައިކަމަށާއި ގައުމުގެ އިގްތިޞާދީ، އިޖްތިމާޢީ އަދި ގަވަރނަންސްގެ މައްސަލަ ނުހަނު ގިނަ ކަމަށް ޑރ ޖަމީލްގެ ޕޯސްޓްގައި ވަނީ ފާހަގަކުރައްވާފައެެވެ.

އެހެންކަމުން އުންމީދަކީ ނަތީޖާ ނެރެދެއްވާނެ ކަން ކަމަށް އެމަނިކުފާނު ވަނީ ވިދާޅުވެފައެވެ. އަދި އެމަނިކުފާނަށް ގަބޫލު ނުކުރެވެނީ، އެނގުމާ ނޭނގުމުގެ ތަފާތެއް ނެތްކަން ރައީސް މުއިއްޒަށް އެނގިވަޑައިނުގަތީމާ ކަމަށް ވިދާޅުވެ ޑރ ޖަމީލް ވަނީ ރައީސް މުއިއްޒަށް ވަރަށް ބޮޑަށް ފާޑުވިދާޅުވެފައެވެ.

ބަރުލަމާނީ ޙަޔާތުގައި މިއަދަކީ ތާރީޚީ ދުވަހެއް ކަމަށް ފާހަގަކުރައްވާ މިހާތަނަށް އެންމެ ފެންވަރާއި އަޚްލާގު ދަށް ރައީސަކު މަޖިލިސް ކުރިއަށް ގެންދާ މިއީ ފުރަތަމަ ފަހަރުކަމަށް ވެސް އެމަނިކުފާނު ވަނީ ވިދާޅުވެފައެވެ.

އެމަނިކުފާނު މިފަދައިން ވިދާޅުވެފައި އެވަނީ ފޮނަދޫ ދާއިރާގެ މެމްބަރު އަދުރޭ މަޖިލިސް ރައީސްކަމަށް ރައީސް މުއިއްޒު އިހުތިޔާރުކުރެއްވުމުންނެވެ.

ޕަބްލިކުގައި އަދުރޭގެ ޑިކްޝްނަރީ ފެންނަން އެބަހުރި ކަމަށް ވިދާޅުވެ އަދުރޭ އަކީ އެ މަގާމަށް ކުފޫ ހަމަނުވާ ބޭފުޅެއް ކަމަށް ޑރ ޖަމީލް ވަނީ ވިދާޅުވެފައެވެ.

20 ވަނަ ރައްޔިތުންގެ މަޖިލީހުގެ މެމްބަރުންގެ ހުވާ ވަނީ މިއަދު ކޮށްފައެވެ. އަދި މަޖިލީހުގެ ރައީސް އަދި ނައިބު ރައީސް ވެސް ވަނީ ހޮވާފައެވެ.