ފުވައްމުލަކް ސިޓީގައި އަލިފާނުގެ ހާދިސާއެއް ހިނގައިފިއެވެ.
އެމްއެންޑީއެފް އިން ބުނެފައި ވަނީ ފުވައްމުލަކު ސިޓީ، ދިގުވާޑު އަވަށު "ގެރަދޫގެ" ބަދިގޭގައި ހުރި ހުޑެއްގައި ރޯވި އަލިފާން، އެމްއެންޑީއެފް ސަދަން އޭރިއާ ކޮމާންޑް، ފުވައްމުލަކު ފަޔަރ ސްޓޭޝަނުން ނިއްވާލައިފިކަމަށެވެ.
މި ހާދިސާ ހިނގާފައި ވަނީ ގޭގެ ބަދިގޭގައި އުދާފައި ހުރި ތެޔޮ ތާހެއްގައި ހުޅުހިފައި ބަދިގޭގައި ހުރި ހުޑުގައި އަލިފާން ރޯވިކަމުން ކަމަށް އެމްއެންޑީއެފްއިން ވަނީ ބުނެފައިއެވެ.
މި ހާދިސާ ހިނގި ކަމުގެ މައުލޫމާތު އެމްއެންޑީއެފަށް ލިބިފައި ވަނީ މިއަދު ހެނދުނު 06:40 ހާއިރު އެމްއެންޑީއެފް ސަދަން އޭރިއާ ކޮމާންޑް، ފުވައްމުލަކު ފަޔަރ ސްޓޭޝަނަށެވެ. މައުލޫމާތު ލިބުމުން އެ ފަޔަރ ސްޓޭޝަންގެ ފަޔަރފައިޓަރުން ވަނީ އެ ސަރަހައްދަށް ގޮސް، އަލިފާން ނިވުމުގެ މަސައްކަތް ކޮށްފައިކަމަށާއި މިގޮތުން ފަޔަރފައިޓަރުން ކުރި މަސައްކަތުން އަލިފާން ނިއްވާލެވިފައިވަނީ 6:48 ހާއިރު ކަމަށްވެސް އެމްއެންޑީއެފްއިން ވަނީ ބުނެފައިއެވެ.
މި ހާދިސާގައި އެެއްވެސް މީހަކަށް އަނިޔާއެއް ލިބިފައެއް ނުވާކަމަށްވެސް ދިފާއީ ބާރުން ވަނީ ހާމަކޮށްފައިއެވެ.
