ރައީސް ޑރ. މުހައްަމދު މުއިއްޒު ކޮންމެ ދުވަހަކު ގެނެސްދެއްވަން ވިދާޅުވި، ރައީސްގެ ޖަވާބު ޕްރޮގްރާމު ހުއްޓިފައި އޮންނަތާ މަސްދުވަސްވެފައިވާ ކަން ހާމަވެއްޖެއެވެ.

ކޮންމެ ދުވަހަކު ކޮންމެވެސް ރައްޔިތެއްގެ ސުވާލަކަށް ޖަވާބުދެއްވުމަށް އަމާޒު ހިފައިގެން ފެށި "ރައީސްގެ ޖަވާބު ޕްރޮގްރާމު އެންމެ ފުރަތަމަ ގެނެސްދިނީ ފެބްރުއަރީ އެއް ވަނަ ދުވަހުއެވެ.

އޭގެ ފަހުން އެކަން ކުރަން އޮންނަ ޓީމަކުން ހޮވާލާ ވަކި ބައެއްގެ ސުވާލުތަކަށް ރައީސް ޖަވާބު ދެއްވައި ވީޑިއޯ އާންމުކުރައްވައެވެ. އެގޮތުން އެފަދަ ގޮތަށް ރައީސްގެ ޖަވާބު އެންމެ ފަހުން ގެނެސްދީފައިވަނީ އެޕްރިލް މަހުގެ 7 ވަނަ ދުވަހުއެވެ. އޭގެ ފަހުން އެ ޕްރޮގްރާމުގެ ހިލަމެއް ނުވެއެވެ.

ހުރިހާ ރައްޔިތުންނަށް ސުވާލު ފޮނުވޭނެ ނިޒާމެއް ގާއިމު ކުރުމުގެ މަސައްކަތް ކުރަމުންދާކަމަށް ހީނާ ވިދާޅުވިއިރު، ސީދާ ރައީސްއާ ސުވާލު ކުރެވޭނެ ޕޯޓަލްއެއް މިދިޔަ ފެބްރުއަރީ 23، ވަނަ ދުވަހު ސަރުކާރުން ވަނީ އިފްތިތާހުކޮށްފައެވެ.

އީފާސް ބޭނުން ކޮށްގެން ލޮގިން ވެވޭ އެ ޕޯޓަލް މެދުވެރިކޮށް ރައްޔިތުންގެ ހިތްތަކުގައި އުފެދޭ ސުވާލުތަކާއި ޝަކުވާތަކުގެ އިތުރުން ސަރުކާރު ހިންގުމަށް ގެންނަން ބޭނުންވާ ހިޔާލު ވެސް ސީދާ ރައީސްއަށް ހުށަހެޅުމުގެ ފުރުސަތު އޮންނަ ކަމަށް ހާމަކޮށްފައިވެއެވެ.

ނަމަވެސް އެ ޕޯޓަލް މެދުވެރިކޮށް ޖަވާބު ލިބެނީ ވަކި ބަޔަކު ކުރާ ސުވާލުތަކަކަށް ކަމަށް ބައެއް އާންމުން ބުނެފައިވެއެވެ. އެގޮތުން ސަރުކާރު ޕްރޮމޯޓުކުރުމަށާ ރައީސް މުއިއްޒު ޕްރޮމޯޓު ކުރުމަށް ރައީސް އޮފީހުން ސުވާލު ލިޔެފައި ސަރުކާރުގެ ބައެއް ސަޕޯޓަރުން މެދުވެރިކޮށް އެ ސުވާލު ކުޅުވުުމަށް ފަހު ރައީސްގެ ޖަވާބާއެެކު ވީޑިއޯ ދޫކޮށްލަނީ ކަމަށް ބައެއް ފަރާތްތަކުން ބުނެފައިވެއެވެ.

ރިޔާސީ ބަޔާނުގައިވެސް ވަރަށް ގަދައަށް ރައީސް އެކަމެއްގެ ޒިކުރު ކުރެއްވި "ރައީސްގެ ޖަވާބު" ޕްރޮގްރާމު ހުއްޓިފައި އޮތް ސަބަބަކާ މެދު ރައީސް އޮފީހުގެ އިސް ތަރުޖަމާނު ހީނާ ވަލީދާ، "ތޭރަ އޮންލައިން" އިން ވާނީ ސުވާލުކޮށްފައެވެ. ނަމަވެސް އަދި ވަކި ޖަވާބެއް ދެއްވާފައިނުވެއެވެ.