ރައްޔިތުންގެ މަޖިލީހުގެ ސަލާމަތީ ހިދުމަތްތަކުގެ ކޮމިޓީ (241 ކޮމިޓީ) އިން ދެ ސްލޮޓް އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ބޭނުންވި ކަމަށާއި ނަމަވެސް އެކަމަށް މަޖިލީހުގެ ސުޕަމެޖޯރިޓީ އޮތް ޕީޕަލްސް ނޭޝަނަލް ކޮންގްރެސް (ޕީއެންސީ) އިން ދެކޮޅު ހެދި ކަމަށް އެމްޑީޕީން ބުނެފި އެވެ.

މަޖިލީހުގެ ދާއިމީ ކޮމިޓީތަކަށް އިއްޔެ މެންބަރުން އައްޔަނުކޮށްފައިވާއިރު އެހެން ކޮމިޓީތަކާ ހިލާފަށް 241 ކޮމިޓީގައި 13 މެންބަރުން ތިއްބަވާނެ އެވެ. އެ ކޮމިޓީގައި އިންނަވަނީ އެމްޑީޕީގެ ފަރާތުން އެންމެ މެންބަރެކެވެ. އެއީ, ނަވާރަވަނަ މަޖިލީހުގައި 241 ކޮމިޓީގެ މުގައްރިރުކަން ވެސް ކުރެއްވި ހަނިމާދޫ ދާއިރާގެ މެންބަރު އަބްދުލްގަފޫރު މޫސާއެވެ.

މަޖިލީހުގެ 241 ކޮމިޓީއަކީ ގާނޫނު އަސާސީގެ 241 ވަނަ މާއްދާއިން ބާރުދީފައިވާ ކޮމިޓީ އެވެ. ނަވާރަވަނަ މަޖިލީހުގައި އެންމެ ފުރަތަމަ މި ކޮމިޓީ އެކުލަވާލިއިރު ތިއްބެވީ 13 މެންބަރުންނެވެ. އޭގެ ތެރެއިން އަށް މެންބަރުން ނިސްބަތްވީ އެމްޑީޕީއަށެވެ.

241 ކޮމިޓީގެ މައިގަނޑު މަސްއޫލިއްޔަތަކީ ސަލާމަތީ ހިދުމަތްތައް ހިނގާ ނުހިނގާ ގޮތް ބެލުމާއި ގައުމީ ސަލާމަތުގެ ކަންކަން ދިރާސާކުރުމާއި ގައުމީ ސަލާމަތުގެ ސިޔާސަތުތަކަށް ގެންނަންޖެހޭ ބަދަލެއް އޮތްނަމަ، އެކަމެއް ފާހަގަކޮށް އެކަމެއް މަޖިލީހަށް ހުށަހެޅުމެވެ.

ސިފައިންނާއި ފުލުހުން، ޑިފެންސް މިނިސްޓްރީ އަދި ނޭޝަނަލް ޑިޒާސްޓަ މެނޭޖްމަންޓް އޮތޯރިޓީއާ ގުޅުން ހުރި މައްސަލައެއް މަޖިލީހުން ބަލާނަމަ އެ މައްސަލައެއް ބަލާނީ 241 ކޮމިޓީންނެވެ. އެ އިދާރާތަކާ ގުޅޭ ގޮތުން ހުށަހަޅާ ބިލުތައް ދިރާސާކުރާނީ ވެސް އެ ކޮމިޓީންނެވެ. އެ އިދާރާތަކުގެ މައްސަލަތައް ބަލައި ކަންތައްތައް އިސްލާހު ކުރަން އެންގުމާއި އެ އިދާރާތަކަށް ފިޔަވަޅު އެޅުމުގެ ބާރު ވެސް އެކޮމިޓީއަށް އޮވެ އެވެ.