މި ސަރުކާރުގެ އިކޮނޮމިކް މިނިސްޓާރ މުހައްމަދު ސައީދު ދައްކަވާ ވާހަކަތައް އެއްވެސް ވަރަކަށް ހަމައެއް ނުޖެހޭކަމަށް މީހުން ބުނާތީ ހުރީ އަޑުއިވިފައެވެ. މިއަދު ދައްކަން މިއުޅޭ ވާހަކައިން އެކަން ހަމަ ވަރަށް ވެސް ސާފުވެގެން ދާނެއެވެ. މިނިސްޓާރ ސައީދަށް ދެެކެވޭ ނުދެކެވޭ ވާހަކައެއް ނޭނގެއެވެ. މިފަހަރު މިނިސްޓާރ ސައީދުގެ ސަބަބުން އަވައްޓެރި ގައުމު އިންޑިޔާގެ ކުރިމަތީ އަނެއްކާވެސް ދިވެހިރާއްޖެ މި ޖެހުނީ ލަދުން މަރުވާށެވެ.

އާދެ. ދައްކަން މިއުޅެނީ މެއި މަހުގެ 25 ވަނަ ދުވަހު އޮތް ނޫސްވެރިންގެ ބައްދަލުވުމެއްގައި މިނިސްޓާރ ސަޢީދު އިއުލާން ކުރެއްވި ވާހަކައިގެ ވާހަކައެވެ. އެއީ ކުޑަ ވާހަަކައެއް ވެސް ނޫނެވެ. ސަޢީދު ވިދާޅުވި ގޮތުގައި ރާއްޖެ އާއި އިންޑިއާއާ ދެމެދު މިނިވަން ވިޔަފާރީގެ އައު އެއްބަސްވުމެއް ޤާއިމު ކުރުމުގެ މަސައްކަތް ދަނީ ކުރަމުންނެވެ. ވަރަށް ފޮނިވެފައި ސައީދު އެވާހަކަ ވިދާޅުވުމުން ހީވީ އިންޑިޔާއިން ސައީދަށް ފިނިފެންމަލުގެ ގުލްދަސްތާއެއް ދީގެން އުޅުއްވިހެންނެވެ.

ނަމަވެސް ސައީދުގެ މިވާހަކަތައް ޗޮކުން ދިޔަކަން އެނގުނީ ސައީދަކީ ދޮގުވެރިއެއް ކަމަށް އެ ގައުމުން ބުނުމުންނެވެ. އާދެ، އާދެ! އިންޑިއާ އިން ރާއްޖެ އާއެކު މިނިވަން ވިޔަފާރީގެ އެއްބަސްވުމެއް ޤާއިމު ކުރަން ބޭނުންވެގެން ހުށަހެޅި ކަމަށް ސަޢީދު ވިދާޅުވި ވާހަކަ، އިންޑިއާގެ އެކްސްޓާނަލް އެފެއާޒް މިނިސްޓްރީގެ ތަރުޖަމާން ރަންދިރް ޖައިސްވާލް ދޮގުކުރެއްވިއެވެ.

މެއި މަހުގެ 30 ވަނަ ދުވަހު އެ ގައުމުގެ އެކްސްޓާނަލް އެފެއާޒް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ރަންދިރް ޖައިސްވާލް ވިދާޅުވީ މިނިވަން ވިޔަފާރީގެ އެއްބަސްވުމެއް ޤާއިމު ކުރަން އިންޑިއާ އިން ހުށަހެޅި ކަމަށް ބުނެ، މިނިސްޓަރު ސަޢީދު ވިދާޅުވެފައި އޮތް ވާހަކައެއް ނޫސްތަކުގެ ހެޑްލައިނުން ފެނުން ކަމަށެވެ. އެވާހަކަ ދޮގުކޮށް އިންޑިއާ އިން އެފަދަ ހުށަހެޅުމެއް ހުށަހަޅާފައި ނުވާނެ ކަމަށް އޭނާ ވިދާޅުވިއެވެ. ދެން އޭނާ ވިދާޅުވީ އެފަދަ އެއްބަސްވުމެއް ރާއްޖެ އިން ހަދަން ބޭނުންވާ ނަމަ، އިންޑިއާ އިން އެކަމަށް މަރުހަބާ ކިޔާނެކަމަށެވެ. މިއޮއް ވެއްޓުނީ ސައީދުގެ ސަބަބުން ރާއްޖޭގެ އަގު؟ ނޫންތަ؟

ޗައިނާ އަށް ކުރެއްވި ރަސްމީ ދަތުރުފުޅު ނިންމަވާލެެއްވުމަށްފަހު ރާއްޖެ ވަޑައިގެން އެއާޕޯޓްގައި ހުންނަވާ ރައީސް މުއިއްޒު ވަނީ، އެދުވަސްކޮޅު ރާއްޖެއަށް އިންޑިޔާއިން ފުރައްސާރަ ކުރަމުން ގެންދާތީވެ،ވަކި ޤައުމެއްގެ ތައްޕާހަށް ވެއްޓިގެން އުޅެން ނުޖެހޭ ކަމަށާއި، ވަކި ޤައުމަކަށް ބަރޯސާވާން ނުޖެހޭ ކަމަށް ވިދާޅުވެފައެވެ. މިއީ އިންޑިޔާއަށް އެމަނިކުފާނު އެއްލެވި ގާކޮޅެކެވެ. ކަންކަން މިހެން ހުންނެވި އިރު އެމަނިކުފާނުގެ ކެބިނެޓްގެ ވަޒީރުން މި ގެންދަވަނީ އިންޑިޔާގެ ފައިބުޑަށް ވެއްޓި ސަލާން ޖަހަމުންނެވެ. ކޮންފަދަ ލަދެއްނެތް ކަމެއްހެއްޔެވެ؟

މިއީ މިދައްކާ ވާހަކައެވެ. ފަލީހަވެގެން މިއުޅެނީ ހަމައެކަނި މިނިސްޓާރ ސައީދެއް ނޫނެވެ. ދިވެހިރާއްޖެއެވެ. އިންޑިޔާގެ އާންމުން ސޯޝަލް މީޑިޔާގައި ބުނަމުން ދަނީ ރާއްޖޭން ނާށިގަނޑު ހިފައިން އިންޑިޔާގެ ފައިބުޑަށް ސަލާން ޖަހަން ވެއްޓިފައި އޮތް ވާހާކައެވެ. ހީކުރީ އިންޑިޔާއިން މިނިސްޓާރ ސައީދަށް ފިނިފެންމަލުގެ ގުލްދަސްތާއެއް އަރިސްކުރީކަމަށެވެ. ހަގީގަތުގައި އެ ފިނިފެންމަލުގެ ގުލްދަސްތާއިން މިވަނީ އެމަނިކުފާނުގެ މޫނު މަތީ ޖައްސަވާފައެވެ.

މިނިސްޓާރ ސައީދެވެ. ހުޝާމަދު ކުރުމުގައި ހުރިހާ އެންމެން ފިނިފެންމަލެއް ބޭނުމެއް ނުކުރައްވާނެއެވެ.