ޑޮލަރުގެ މައްސަލަ ދެތިން މަސް ތެރޭ ހައްލުކުރައްވާނެ ކަމަށް ވިދާޅުވެ އިކޮނޮމިކް މިނިސްޓާރ މުހައްމަދު ސައީދު ހެއްދެވީ އިތުރުފުޅެއްކަން ހާމަވެއްޖެއެވެ.
ފެބްރުއަރީ މަހުގެ 13 ވަނަ ދުވަހު ފެށި ރާއްޖޭގެ އިންވެސްޓްމަންޓް ފޯރަމްގެ ކުރިން ނޫސްވެރިންނާ ވާހަކަ ދައްކަވަމުން މިނިސްޓާރ ސައީދު ވަނީ ރާއްޖެ އަށް ދިމާވެފައިވާ ޑޮލަރުގެ މައްސަލަ ކުރިއަށް އޮތް ދެތިން މަސް ތެރޭގައި ހައްލުވާނެ ކަމުގެ ފުރިހަމަ ޔަގީންކަން ދެއްވާފައެވެ.
އެ އިންޓަވިޔުގައި ސައީދު ވަނީ ޑޮލަރު ތާށިވުމުގައި ދެކަމެއް އުޅޭކަމަށް ފާހަގަކުރައްވާފައެވެ.
އެ އިންޓަރވިއުގައި ސައީދު އިތުރަށް ވިދާޅުވީ މިސްމެނޭޖް ވެފައިހުރި ހުރިހާކަމެއް ހައްލަކަށް އަޅުވާނެ ކަމަށެވެ.
އެހެންނަމަވެސް ރާއްޖެއަށް ކުރިމަތިވެފައިވާ ޑޮލަރުގެ މައްސަލަ ހައްލުކޮށް ދެތިން މަސްތެރޭ އެއްކޮށް ހަމަޔަކަށް އަޅުވާނެކަމަށް މިނިސްޓާރ ސައީދު ވިދާޅުވިތާ 4 މަސް ވާން މިހާރު ވަނީ ކައިރިވެފައެވެ.
ރާއްޖެއަށް ކުރިމަތިވެފައިވާ ޑޮލަރުގެ މައްސަލައަށް އަދިވެސް ހައްލެއް ލިބިފައިނުވާތީ ވިޔަފާރި ކުރާ ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.
އެގޮތުން މިހާރު ކަޅު ބާޒާރުގައި ޑޮލަރެއްގެ އަގު އުޅެނީ 18 ރުފިޔާއަށް ކަން ފާހަގަކޮށްލެވެއެވެ.
