ސަހްޔޫނީންގެ އިސްތިއުމާރުގެ ދަށަށް ގޮސްފައިވާ ފަލަސްތީން މިނިވަން ކުރުމަށްޓަކައި މަސައްކަތްކުރުމަކީ މުޅި އިސްލާމީ އުއްމަތުގެ މައްޗަށް އޮތް ދީނީ ވާޖިބެއް ކަމަށް މިއަދުގެ ހުކުރު ޚުތުބާގައި ގޮވާލާފިއެވެ.

ފަލަސްތީނުގެ އެކި ސަރަހައްދުތަކަށް އިޒްރޭލުން ދެމުންދާ އުދުވާނީ އަމަލުތަކަކީ ސީދާ ނަސްލެއް ނައްތައިލުމަށް ހިންގަމުން އަންނަ ޖަރީމާތަކެއް ކަމަށާއި ކުޑަކުއްޖަކަށް، އަންހެނަކަށް މުސްކުޅިއަކަށް ބެލުމެއްނެތި އެތައް ހާސް ބައެއް މިއަދާއި ހަމައަށް ޝަހީދުކޮށްފައިވާ ކަމަށް ފާހަގަކޮށްފައިވެއެވެ. މި އަނިޔާވެރި އުދުވާނީ އަމަލުތައް ކުށްވެރިކުރާ ހާލު، މި އަމަލުތައް ހުއްޓުވުމަށްޓަކައި ފިޔަވަޅު އެޅުމަށް ބައިނަލްއަޤްވާމީ ފަރާތްތަކަށް ވަނީ ގޮވާލާފައެވެ.

މީގެ އިތުރުން، މުސްލިމުންގެ ހައިސިއްޔަތުން އިސްލާމީ ގައުމަކަށް މިފަދަ އަނިޔާވެރި އަމަލުތައް ހިންގަމުންދާއިރު އެ ފަރާތްތަކަށް އަދާކުރަންޖެހޭ އަޚްލާގީ ވާޖިބުތަކެއް ވާކަން ވަނީ މިއަދުގެ ޚުތުބާގައި ބަޔާންކޮށްފައެވެ. މިގޮތުން ފަލަސްތީނުގެ ދިފާއުގައި އަޑު އުފުލުމާއި، ފަލަސްތީނުގެ ރައްޔިތުންނަށްޓަކައި ހެޔޮ ދުޢާ ކުރުމާއި އަދި އިންސާނީ ގޮތުން އެހީތެރިވުމަށް އަޅުގަނޑުމެން އެންމެން އަތުގުޅާލަން ޖެހޭ ކަމަށް އަލިއަޅުވާލާފައިވެއެވެ.

މިފަދަ ހަނގުރާމަތަކަކީ އިސްލާމީ ހަޟާރަތު ނެތިކޮށްލުމަށްޓަކައި ކާފަރުން ހިންގަމުންދާ އަމަލުތަކެއް ކަމާއި އިސްލާމްދީނުގެ އުޞޫލުތަކުގައި ސާބިތުކަމާއި އެކު ތިބެންޖެހޭ ކަމަށް އިސްލާމީ އުއްމަތަށް ވަނީ ގޮވާލާފައެވެ. އަދި ފަލަސްތީނުގެ ރައްޔިތުންނާއި މެދު ދިވެހިންގެ ހިތްތަކުގައި ލޯތްބާއި އުޚުއްވަތްތެރިކަން ވަނީ ބިންވަޅު ނެގިފައި ކަމަށާއި ފަލަސްތީނުގެ ރައްޔިތުންނަށް އެހީތެރިވުމުގައި ދިވެހިރާއްޖެއިން ދުނިޔެއަށް ދައްކަމުންދާ ރިވެތި ނަމޫނާ ވަނީ ފާހަގަކޮށްފައެވެ.

ޚުތުބާ ނިންމާލަމުން އިސްލާމީ އުއްމަތް ވަރުގަދަ ކުރުމަށް އިސްލާހީ މަސައްކަތްތައް ކުރުމަށް އަޒުމު ކަނޑައެޅުމަށާއި އަދި ޢަރަފާތު ދުވަހު މުސްލިމް އުއްމަތަށް ނަސްރު ދެއްވުމަށޤ އެދި ޚާއްސަކޮށް ދުޢާ ކުރުމަށް ނަސޭހަތްތެރިވެފައިވެއެވެ.