ކިންގް ސަލްމާން މިސްކިތް ރޭގަނޑު 21:00 ގެ ފަހުން ބަންދުކުރާ މައްސަލައިގައި އާންމުންގެ ޝަކުވާ އާއި ކަންބޮޑުވުން އުފެދިއްޖެއެވެ.

މައުލޫމާތު ލިބިފައިވާ ގޮތުގައި މިސްކިތް ަންދުކުރަމުން އަންނަނީ ޕާޓޭން މިސްކިތަށް ވަންނާތީ ކަމަށާއި އަދި މިސްކިތުގެ ތަކެއްޗަށް ގެއްލުންދޭތީ ކަމަށް ބުނެއެވެ. ނަމަވެސް މިއީ މި މައްސަލައިގެ ހައްލު ނޫންކަމަށާއި މިއަށްވުރެ ހަރުދަނާ އުސޫލުތަކެއް ސަރުކާރުން ނުވަތަ ކަމާއި ބެހޭ ވުޒާރާއިން ނެގެން ޖެހޭނެ ކަމަށެވެ.

މިސްކިތުގެ ހޯލު ބަންދުކުރި ކަމުގައި ވިޔަސް ނަމާދު ކުރާ ބައި ބަންދުކުރުމަކީ އެއްވެސް ގޮތއްގައި ބަލައިގަނެވޭނެ ކަމެއް ނޫން ކަމަށް ބުނެ އާންމުން އަންނަނީ ފާޑު ކިޔަމުންނެވެ. މިސްކިތް ބަންދުކުރާ ފަހުންވެސް ވަރަށް ގިނަ މީހުން މިސްކިތަށް ނަމާދުކުރަން ވަންނަކަން ފާހަގަކުރެވިފައިވެއެވެ.

ފާއިތުވި ރަމަޟާން މަހުގައި ވެސް ތަރާވީޙަށް ފަހު މިސްކިތް ބަންދުކުރާ މައްސަލަ ފެންމަތިވެފައިވެއެވެ. އޭރު އިސްލާމިކް މިނިސްޓްރީ އިން ބުނެފައިވަނީ ނަމާދުކުރާ ބައި ބަންދު ނުކުރާ ކަމަށާއި ހޯލް ބަންދުކޮށްފައިވަނީ ކާޕެޓް މަސައްކަތް ކުރާތީ ކަމަށެވެ.

މިސްކިތް ބަންދުކުރުމާއި ގުޅޭ ޝަކުވާތައް ފެންމަތިވެފައިވާއިރު އިސްލާމިކް މިނިސްޓްރީ އިން މި މައްސަލައަށް މިހާތަނަށް އެޑްރެސް ކޮށްފައި ނުވެއެވެ.

މި ފަދަ ފިޔަވަލުތައް ސަރުކާރުން ނަގަމުންދާނަމަ، އާންމުންގެ މެދުގައި ދީނީ އެއްބައިވަންތަކަން ނެތި ނުރަނގަޅު އާދަތަކެއް އުފެދިގެންދާނެ ކަމުގެ ބިރު އެބައޮތެވެ.