ނިމިދިޔަ ސަރުކާރުގެ ފްލެޓް ކޮމިޓީގައި ހިމެނޭ މެމްބަރުން ދިރިއުޅުއްވާ ގެތައް ފާސްކުރަން ފަށައިފިއެވެ.

މައުލޫމާތު ލިބިފައިވާ ގޮތުގައި ފާސްކުރަމުން އަންނަނީ އެ ކޮމިޓީގައި ކުރިން ތިއްބެވި ބޭފުޅުންނާ ގުޅުން ހުރި ތަންތަނެވެ.

އެގޮތުން ކުރީގެ ސްޓޭޓް މިނިސްޓަރު އަކްރަމް ކަމާލުއްދީނާއި، އަހްމަދު ވިސާން ނަސީމާއި، މުޙައްމަދު އާރިފް، އަދި ލިރުޣަމް ވަހީދު އުޅުއްވާ ތަންތަން އެންޓި ކޮރަޕްޝަން ކޮމިޝަންއިން ގެންދަނީ ބަލާ ފާސްކުރަމުންނެވެ..

މި ކަމާ ގުޅޭގޮތުން އޭސީސީން ހާމަކޮށްފައިވާ މައުލޫމާތަށް ބަލާއިރު އެ ފަރާތްތައް ދިރިއުޅޭ ތަންތަން ފާސްކުރަމުން ދަނީ އޭސީސީއިން މިހާރު ތަހުގީގު ކުރަމުންދާ ގެދޮރުވެރިޔާ ސްކީމުގެ 4،000 ފްލެޓު ދޫކުރި ގޮތުގެ މައްސަލައިގައެވެ.

އެ ގޮތުން ކޯޓު އަމުރާއެކު ފާސްކުރަމުން އަންނަނީ އެ މައްސަލައާ ގުޅުންހުރި ބައެއް ފަރާތްތަކާ ގުޅުންހުރި ބައެއް ތަންތަން ކަމަށް އޭސީސީއިން މައުލޫމާތު ދީފައިވެއެވެ..

ގެދޮރުވެރިޔާ ސްކީމްގެ ދަށުން 4،000 ފުލެޓް ދިނުމަށް ޝަރުތު ހަމަވާ މީހުންގެ ލިސްޓު އާންމު ކުރުމުން، ފުލެޓުތައް ދޫކުރުމުގައި މައްސަލަ އުޅޭ ކަމަށް ބުނެ، އޭސީސީން ޖިނާއީ ތަހުގީގެއް ފެށިއެވެ.

އެ ތަހުގީގާ ގުޅިގެން ގިނަ ދުވަސްތަކެއް ވަންދެން ފުލެޓު ދޫކުރުން މަޑު ޖެހިފައި އޮތުމަށް ފަހު އެޕްރީލް އެކެއްގައި އޭސީސީން ވަނީ ބައެއް ކަންތަކަކަށް ރިއާޔަތްކުރުމަށް ފަހު ފުލެޓު ދޫކުރުމުގެ މަސައްކަތް ކުރިއަށް ގެންދަން ހުއްދަ ދީފައެވެ.