މިއަހަރު ހައްޖުގެ އަޅުކަން އަދާކުރުމަށް ދިވެހިރާއްޖެއިން ފުރުމަށް ހަމަޖެހިފައިވާ އެންމެ ފަހު ބެޗް މިއަދު ފުރާވަޑައިގަންނަވައިފިއެވެ.

ނޫސްވެރިންނާއި ބައްދަލުކޮށް އިސްލާމިކް މިނިސްޓަރު އަހްމަދު ޝަހީމް ވިދާޅުވީ މިއީ ހައްޖު ކޯޕަރޭޝަންގެ އެހީތެރިކަމާއި އެކު އެންމެ ގިނައިން ހައްޖުކުރުމަށް ދިވެހިން ފުރާ ދެވަނަ ފަހަރުކަމަށެވެ. އެންމެ ގިނައިން ދެން ހައްޖުކުރުމަށް ގޮސްފައިވަނީ 2015 ވަނަ އަހަރު ރައީސް ޔާމީންގެ ވެރިކަމުގައެވެ. މި އަހަރު ގޮސްފައިވަނީ 1150 ހައްޖާޖީންނެވެ.

މީގެ އިތުރުން، ހައްޖަށް ދިޔުމަށް ހައްޖު ކޯޕަރޭޝަންގައި ނަން ނޯޓުކޮށްފައިވާ ކިޔޫ ދިގުވެގެން އާންމުން ޝަކުވާ ކުރަމުންދާތީ މިނިސްޓަރ ވަނީ އެކަމަށް އަލިއަޅުވާލާފައެވެ. މިގޮތުން ކިޔޫ ދިގުވެފައިވަނީ ކޮވިޑްގެ ބަލިމަޑުކަމުގެ ސަބަބުން 2020 އަދި 2021 ވަނަ އަހަރު ހައްޖަށް ދިޔުމުގެ ފުރުސަތު ލިބިފައިނުވާތީ ކަމަށް ވިދާޅުވެފައިވެއެވެ. އަދި 2022 ވަނަ އަހަރު ސައުދީން ފުރުސަތު ހުޅުވާލުމާއިއެކު އެ އަހަރު ފޮނުވާލެވިފައިވަނީ 400 އެއްހާ މީހުން ކަމަށްވެސް މިނިސްޓަރު ވިދާޅުވިއެވެ. މިއީ ކިޔޫ ފަޅާ ކޮރަޕްޝަންގެ އަމަލުތަކަށް މަގުފަހި ކޮށްފައިނުވާނެ ކަމަށާއި މި މައްސަލައަކީ ދުނިޔޭގެ ހުރިހާ ގައުމަކަށްވެސް ދިމާވެފައިވާ މައްސަލައެއްކަމަށް ފާހަގަކުރެއްވިއެވެ.

އަދި ހައްޖާޖީންނަށް ފަރުވާ ކުރުމަށް ނޫރު މިސްކިތް ނަމަކަށް ކިޔާ މިސްކިތުން ހިލޭ ބޭސްފަރުވާ ކުރެވޭނެ ކަމަށް ވެއެވެ. މިއީ ސައުދީ ސަރުކާރުގެ އެހީތެރިކަމާއި އެކު ހަމަޖެހިގެން ދިޔަ ކަމެއް ކަމަށް މިނިސްޓަރު ފާހަގަކުރެއްވިއެވެ.