ނިމިދިޔަ ޑިސެމްބަރު މަހު ރާއްޖޭގެ އެކި ކަންކޮޅުތަކުގައި އުފަންވި 205 ކުދިންނަށް ސްޓޭޓް ޓްރޭޑިން އޯގަނައިޒޭޝަން ( އެސްޓީއޯ ) އިން ގިފްޓް ޕެކް ހަދިޔާކޮށްފިއެވެ.

"ފަހުރުވެރި އާއިލާ"ގެ ނަމުގައި އެސްޓީއޯއިން ހަދިޔާކުރާ މި ގިފްޓް ޕެކްތަކުގައި ހިމެނެނީ އަލަށް އުފަންވާ ދަރިފުޅުގެ އިތުރުން މައިމީހާ އަށް ބޭނުންވާ ތަފާތު އެކިއެކި ސާމާނެވެ.

އެގޮތުން ނިމިދިޔަ މަހު އައިޖީއެމްއެޗް، ހުޅުމާލެ ހޮސްޕިޓަލް، ކުޅުދުއްފުށީ ހޮސްޕިޓަލް، އުނގޫފާރު ހޮސްޕިޓަލް، ގަން ރީޖަނަލް ހޮސްޕިޓަލް، ޑރ. އަބްދުއް ސަމަދު މެމޯރިއަލް ހޮސްޕިޓަލް، ފުވައްމުލަކު ހޮސްޕިޓަލް އަދި އައްޑޫ އިކުއެޓޯރިއަލް ހޮސްޕިޓަލުގައި އުފަންވި ކުދިންނަށް ވަނީ މި ގިފްޓް ޕެކް ހަދިޔާކޮށްފައެވެ.

މީގެއިތުރުން އެސްޓިއޯއިން ހާމަކޮށްފައިވާގޮތުގައި ނިމިދުޔަ ޑިސެމްބަރު މަހު އެންމެ ގިނައިން ގިފްޓް ޕެކް ދީފައިވަނީ އަންހެން ކުދިންނަށެވެ. އެގޮތުން 109 އަންހެން ކުއްޖަކަށް ގިފްޓް ޕެކް ހަދިޔާކޮށްފާވާއިރު 96 ފިރިހެން ކުއްޖަކަށް ގިފްޓް ޕެކް ވަނީ ހަދިޔާކޮށްފައެވެ.

އެސްޓީއޯއިން ބުނެފައިވާ ގޮތުގައި އެބޭފުޅުންގެ އަމާޒަކީ މި ކެމްޕޭން ރާއްޖޭގެ ހުރިހާ ހޮސްޕިޓަލަކަށް ފުޅާކުރުން ކަމަށް އެ ކުންފުނިން ވަނީ ބުނެފައެވެ.

އެސްޓީއޯއިން ދޭ ގިފްޓް ޕެކްގައި ހިމެނޭނީ އެކުންފުނިން ރާއްޖެއަށް އެތެރެ ކުރާ ޕިއުރިޓީ ބްރޭންޑުގެ ރީތިވާ ސާމާނެވެ. އެގޮތުން ޕިޔުރިޓީ ބްރޭންޑްގެ އުފެއްދުންތަކަކީ ކުޑަކުދިންގެ ނާޒުކު ހަންގަނޑަށް ފަސޭހަ އަދިހަމައެހެންމެ ދުޅަހެޔޮ މާއްދާތައް އެކުލެވޭ އުފެއްދުމެއް ކަމަށް އެސްޓީއޯއިން ބުނެއެވެ.

މީގެ އިތުރުން މި ގިފްޓު ޕެކުގައި މައިންބަފައިންނަށް ޚާއްސަ އަތްމަތީ ފޮތެއްވެސް ހިމަނާފައިވެއެވެ. އެގޮތުން މި ފޮތުގެ އެންމެ ބޮޑު އެއް ބޭނުމަކީ ދަރިން ބެލުމުގައި ދިމާވާ އާންމު މައްސަލަތަކުގެ އިތުރުން އެ މައްސަލަތަކަށް ހައްލު ހޯދައިދިނުމަށާއި އެނޫންވެސް ކަންކަމަށް އެހީތެރިވުމަށް ތައްޔާރުކޮށްފައިވާ ފޮތެކެވެ. މި ފޮތަށް ރާއްޖޭގެ ސިއްހީ މާހިރުން ވެސް ވަނީ ތައުރީފު ކުރައްވާފައިވެއެވެ.