ހިޔާގެ ބައެއް ޓަވަރުތަކުން ފެނުގެ ޚިދުމަތް މެދު ކެނޑިފައިވާތާ ހަތަރު ގަޑިއިރުވެފައިވާ ކަމަށް ތޭރަ އޮންލައިނަށް މައުލޫމާތު ލިބިއްޖެއެވެ.

އެގޮތުން ހިޔާގެ 1 ވަނަ ޓަވަރުގައި ދިރިއުޅެމުންދާ ފަރާތުން ތޭރަ އޮންލައިނަށް މައުލޫމާތު ދީފައިވާ ގޮތުގައި މެންދުރު 12 ޖެހިއްސުރެ އެ ޓަވަރަށް ވަނީ ފެނުގެ ޚިދުމަތް މެދުކެނޑިފައެވެ. އޭގެ ސަބަބުން ހުކުރަށް ދާންވެސް ދަތިތަކާ ކުރިމަތިވިއިރު ގޭގައި ތިބި ކުޑަ ކުދިންނާ އަދި އުމުރުން ދުވަސް މީހުންނަށްވެސް ގަޟާ ހާޖާ ކުރުމަށްވެސް ވަނި ދަތިވެފައެވެ.

މިކަމާ ގުޅިގެން މައުލޫމާތު ހޯދާލުމަށް އެމްޑަބްލިއުއެސްސީއަށް ތޭރަ އޮންލައިންއިން ގުޅާލުމުން ބުނެފައިވަނީ ދިމާވި ޓެކްނިކަލް މައްސަލައަކާ ގުޅިގެން ހިޔާގެ ބައެއް ޓަވަރުތަކުން ފެނުގެ ޚިދުމަތް މެދުކެނޑިފައިވާ ކަމަށާ މައްސަލަ ހައްލުކުރުމަށް މަސައްކަތްކުރަމުން ދާ ކަމަށެވެ. މިހާރު މައްސަލަ ދެނެގަނެވިފައިވާ ކަމަށްވެސް އެމްޑަބްލިއުއެސްސީއިން ވަޏި ބުނެފައެވެ. ނަމަވެސް ދިމާވެގެން އުޅެނީ ކޮން މައްސަލައެއް ކަމެއް ބުނެފައިނުވެއެވެ.

އެޗްޑީސީއިންވެސް ވަނީ ހިޔާގެ ބައެއް ޓަވަރުތަކަށް ފެނުގެ ޚިދުމަތް މެދުކެނޑިފައިވާކަން ތޭރަ އޮންލައިނަށް ކަށަވަރުކޮށްދިީފައެވެ. އަދި އެމްޑަބްލިއުއެސްސީއިން މިހާރު މައްސަލަ ހައްލުކުރަން މަސައްކަތްކުރަމުން ދާކަމަށްވެސް ބުނެފައިވެއެވެ.