މޫސުން ގޯސް ނަމަ މާލޭގެ މިސްކިތްތަކުގައި އީދު ނަމާދުކުރާނެކަމަށް އިސްލާމިކް މިނިސްޓަރީން ހާމަކޮށްފިއެވެ.

އެ މިނިސްޓަރީން ކުރި އިއުލާނެއްގައި ބުނީ އީދު ދުވަހު ބޮޑު ޖަމާއަތުގައި އީދު ނަމާދު ކުރަން މޫސުން ތަންނުދީފިނަމަ މާލޭގައި ހުކުރު ކުރާ ހުރިހާ މިސްކިތްތަކެއްގައި ވެސް އީދު ނަމާދު ކުރާނެ ކަމަށެވެ.

ނަމަވެސް އަދި ހަމަޖެހިފައި އޮތީ 24 މިސްކިތެއްގައި އީދު ނަމާދު ކުރާ ގޮތަށް ކަމަށް އެ އިއުލާނުގައި ބުނެފައިވެ އެވެ.

އެގޮތުން މާލޭ ސަރަހައްދުގައި އީދު ނަމާދު ކުރުމަށް ނިންމާފައި ވަނީ ހުޅުމާލޭ ދެވަނަ ފިޔަވަހީގެ ތިން މިސްކިތަކާއި ހުޅުމާލޭ އެއްވަނަ ފިޔަވަހީގެ ހަތަރު މިސްކިތެއްގެ އިތުރުން މާލޭގެ 16 މިސްކިތަކާއި ވިލިމާލޭގެ މަސްޖިދުލް ސަލާމްގަ އެވެ.

އޭގެއިތުރުން ދެން އީދު ނަމާދު ކުރުމަށް އިސްލާމިކް މިނިސްޓަރީން ނިންމާފައި ވަނީ މާލޭގެ ހަތަރު ސަރަހައްދެއްގައި ބޮޑު ޖަމާއަތުގަ އެވެ. އޭގެ ތެރޭގައި ހިމެނެނީ، މާލޭގައި މާފަންނު ބޯޅަ ދަނޑާ ހުޅުމާލޭ ދެވަނަ ފިޔަވަހީގައި ކްރިކެޓު ސްޓޭޑިއަމް ސަރަހައްދުގައާ ހުޅުމާލޭ އެއްވަނަ ފިޔަވަހީގައި ސިންތެޓިކް ޓްރެކް ސަރަހައްދުގެ އިތުރުން ވިލިމާލޭގައި ވިލިނގިލީ ބޯޅަ ދަނޑުގައެވެ.

އީދު ނަމާދު ފަށާ ގަޑިއަށް މި އަހަރު ގެނައި ބަދަލާއެކު ބޮޑު އީދު ނަމާދު ވެސް ފަށާނީ ހެނދުނު 7:00 ގައެވެ.

އިސްލާމިކް މިނިސްޓަރީން ބުނީ އީދު ނަމާދު ކުރަން ހަމަޖެއްސި ހުރިހާ މިސްކިތަކާއި މައިދާންތަކުގައި ވެސް އަންހެނުންނަށް ނަމާދު ކުރެވޭ ގޮތަށް އިންތިޒާމުތައް ހަމަޖައްސާފައި ވާނެ ކަމަށެވެ.