މަސް ގަންނަ ރޭޓާއި ނުކުޅެވޭ ގޮތަށް ގާނޫނެއް ތަންފީޛު ކުރުމަށް މަސްވެރިން ގޮވާލައިފިއެވެ. މަސްވެރިންނަށް ދޭން ޖެހޭ ފައިސާ ދޫނުކޮށް ދެމަސް ވެގެން ގޮސްފައިވާތީ މަސްވެރިން ވަނީ މުޒާހަރާއަށްވެސް ނުކުމެފައެވެ. މިގޮތުން ކުރީ ސަރުކާރުން މަސްކިލޯގެ އަގު 25/- އަށް މަތިކުރުމަކީ ހެދި ވަރަށް ބޮޑު ގޯހެއް ކަމަށް މަސްވެރިން އަންނަނީ ބުނަމުންނެވެ. އެކަމުގެ ސަބަބުން އޭގެ ނާޖާއިޒު ފައިދާ ނަގައި މިއަދުގެ ސަރުކާރުން މަސްވެރިންނަށް ފައިސާ ދޫކުރުމުގައި ދަތިތައް ކުރިމަތިވެ ލަސްކުރަމުން އަންނަކަމަށްވެސް ބުނެފައިވެއެވެ.
އެހެންކަމުން އެއްވެސް ސަރުކާރަކުން ސިޔާސީ މަންފާތައް ހާސިލުކުރުމަށް މަހުގެ އަގުތަކާއި ނުކުޅެވޭ ގޮތަށް ގާނޫނެއް އޮތުމަކީ މަސްވެރިންނަށްވެސް ހިތްހަމަޖެހުން ލިބޭނެ ކަމެއްގެ ގޮތުގައި ފާހަގަކޮށްފައިވެއެވެ. މިއީ ނުވާ ވަރުގެ ކަމެއް ނޫން ކަމަށާއި ސަރުކާރުން ބޭނުންވެއްޖެ ނަމަ މިފަދަ ގާނޫނެއް އެކުލަވާލެވޭނެކަމަށް މަސްވެރިން ބުނެއެވެ.
މަސްވެރިންގެ މުޒާހަރާ ތަކާއި ގުޅިގެން ނުދެވިހުރި 80 މިލިއަންގެ ތެރެއިން 46 މިލިއަން ވަނީ ދޫކޮށްފައެވެ. ނަމަވެސް ބާކީ ދޭންޖެހޭ 34 މިލިއަން ދޫކުރާނެ މުއްދަތެއް އަންގާފައި ނުވެއެވެ.
