ޖިންނި ޝައިތާނުންގެ ސިފަ ޖައްސައިގެން ތިބެ ޢީދު ފަދަ މާތްވެގެންވާ މުނާސަބާތައް ފާހަގަކުރުމަކީ ޝަރުޢީ ގޮތުން ހުއްދަކަމެއް ނޫން ކަމަށް އިސްލާމިކް މިނިސްޓަރ ޑރ މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ރާއްޖޭގެ އެކި ސަރަހައްދުތަކުގައި އީދު ފާހަގަކުރުމަށް ރާވާ ހިންގަމުންދާ ހަރަކާތްތަކުގައި، ބިރުވެރި ސިފައަށް ތިބޭ މާލިތަކާއި އެނޫންވެސް އިސްލާމީ ހަމަތަކުގެ ބޭރުން ކަންކަން ކުރިއަށް ގެންދަމުންދާތީ މިނިސްޓަރ ވަނީ ކަންބޮޑުވުން ފާޅުކޮށްފައެވެ.

ދިވެހިރާއްޖެއަކީ އިސްލާމީ ސަގާފަތެއް އޮންނަ ގައުމަކަށް ވީ ހިނދު އިސްލާމީ ރިވެތި ގޮތްތައް ދޫކޮށް ސަގާފަތުގެ ނަމުގައި ޚުރާފީ ކަންކަން ދިރުވުމަކީ އެންމެ ރަނގަޅު ގޮތް ނޫން ކަމަށްވެސް މިނިސްޓަރ ފާހަގަކުރައްވާފައިވެއެވެ.

އަޟަހާ އީދު ފާހަގަކުރުމށް އެކި ހިސާބުތަކުގައި އިސްލާމީ ޝިޢާރުގެ ބޭރުން މުންކަރާތްތައް އާންމުކޮށް ދެޖިންސު މަސްހުނިވެ މިއުޒިކު ކުޅުން ފަދަ ހަރަކާތްތައް ކުރިއަށް ގެންގޮސްފައިވާ ކަން ފާހަގަކުރެވެއެވެ.