ކުށް ކުރުން ހުއްޓުވޭނީ ގާނޫނު ތަންފީޒްކުރުމާއެކު، ސަރުކާރުން ގާނޫނީ ޒިންމާ އަދާކޮށްގެން ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ން ބުނެފިއެެވެ.

އެމްޑީޕީން މިފަދައިން ބުނެފައިވަނީ އެ ޕާޓީން ނެރުނު ނޫސްބަޔާނެއްގައެވެ.

އެ ޕާޓީން މިހެން ބުނެފައި ވަނީ ކުރީ ސަރުކާރުން ޖަލުގައި ތިބި ކުށްވެރިން ދޫކޮށްލުމުން މާލެ ސަރަހައްދުގައި ކުށްތައް ގިނަވެފައިވާ ކަމަށް ފުލުހުން ތަރުޖަމާން އަދި އެސިސްޓެންޓް ކޮމިޝަނާ އޮފް ފޮލިސް އަހްމަދު ޝިފާން ވިދާޅުވުމާއި ގުޅިގެންނެވެ.

ކުރީ ސަރުކާރުގައި ކުށްކޮށްފައިވާ ފަރާތްތައް ދޫކުރި ނަމަވެސް މި ސަރުކާރު އައި ފަހުން ވެސް ވަނީ ބޮޑެތި ކުށްތަކަށް އަރައިގަނެފައިވާ ފަރާތްތަކާއި ކުށްތައް ސާބިތުވެފައިވާ ފަރާތްތައް ދޫކޮށްލާފައެވެ.

އިތުރަށް އެ ބަޔާނުގައި ބުނެފައިވާ ގޮތުން ކުށް ކުރުން އިތުރުވެފައިވަނީ މީގެ 10 މަސް ކުރިން ބަންދުން ދޫކޮށްލި ބައެއްގެ ސަބަބުން ކަމަށް ފުލުހުންގެ ތަރުޖަމާނު ވިދާޅުވެފައިވަނީ އެކަމަށް ބާރުދޭނެ އެއްވެސް ހެއްކެއް، ތަފާސްހިސާބެއް، ދިރާސާއެއް ނުވަތަ ލިޔެކިޔުމެއް ނެތި ސިޔާސީ މަންފާއެއް ހާސިލު ކުރުމުގެ ބޭނުމުގައި ކަމަށެވެ.

ޤައުމުގެ އަމަން އަމާންކަން ބެލެހެއްޓުމާއި ކުށް ކުރުން ހުއްޓުވުމުގެ ގާނޫނީ މަސްއޫލިއްޔަތު މަތިކޮށްފައި އޮތް ފުލުހުންގެ ފަރާތުން މިފަދަ ވާހަކައެއް ދެއްކުމަކީ ޒިންމާދާރުކަން ކުޑަ ކަމެއްގެ ގޮތުގައި އެ ޕާޓީން ދެކޭކަމަށް ވެސް ބަޔާނުގައި ވަނީ ބުނެފައެވެ.

ކުށް ކުރުން ހުއްޓުވޭނީ ފުރިހަމައަށް ގާނޫނު ތަންފީޒު ކުރުމާއެކު، ސަރުކާރުން ގާނޫނީ ޒިންމާ އަދާކޮށްގެން ކަމަށް ވެސް އެ ބަޔާނުގައި އެމްޑީޕީން ވަނީ ބުނެފައެވެ.