މަސްވެރިންގެ ކަންބޮޑުވުންތަކަށް ސަރުކާރުން އެކަށީގެންވާ ޖަވާބެއް ނުދޭނަމަ، އައްޑޫ މަސް ފެކްޓަރީން ކަރަންޓު ކަނޑާލައި، މަސްވެރިން އެތަނާ ޙަވާލުވާނެކަމަށް މަސްވެރިން ގޮވާލައިފިއެވެ.

އައްޑޫގައި އިހުތިޖާޖު ކުރަމުންދާ މަސްވެރިން މީޑިޔާތަކަށް މައުލޫމާތު ދެމުން ބުނެފައިވަނީ މިއަދުގެ 4:00 ހަމައަށް ސަރުކާރުން އެކަށީގެންވާ ޖަވާބެއް ނުލިބޭކަމުގައިވާނަމަ، އައްޑޫ މަސް ފެކްޓަރީން ކަރަންޓު ކަނޑާލައި، އެތަނުގެ މުވައްޒަފުން ނެރުމަށްފަހު މަސްވެރިން އެތަނާ ޙަވާލުވާނެ ކަމަށެވެ

މަސްވެރިން ގޮވާލަމުންދަނީ ފިޝަރީޒް މިނިސްޓަރ ވަޑައިގެތް މައްސަލަ ހައްލުކުރުމަށް އެ ފަރާތްތަކާއި އެކުގައި މަޝްވަރާ ކުރުމަށާއި އަދި ގިނަވެގެން 15 ދުވަސް ތެރޭ ބާކީ ފައިސާ ދޫކޮށްދެއްވުމަށެވެ. މީގެ އިތުރުން ފައިސާ ނުލިބި ދެމަހަށްވުރެ ގިނަ ދުވަސްވެފައިވާއިރު، ހަމައަށް ހުރިހާ ފައިސާއެއް ދެވޭނެ ތާރީޚެއް ހާމަކުރުމަށްވެސް މަސްވެރިން ގޮވާލާފައިވެއެވެ.

އަދި މަސްވެރިންގެ އިހުތިޖާޖަށް ފުލުހުންގެ ބާރު ބޭނުން ނުކުރުމަށާއި، ކަންބޮޑުވުންތައް ރައީސް އާއި ހަމައަށް ގެންދަންވެސް މަސްވެރިން ތައްޔާރުކަމަށްވެސް ބުނެފައިވެއެވެ.

މަސްވެރިން ފާހަގަކުރާ ގޮތުން ރާއްޖޭގެ ތާރީޚުގައިވެސް މަސްވެރިން އެންމެ ބިކަކޮށްފައިވަނީ ޑރ މުއިއްޒުގެ ވެރިކަމުގައެވެ.