ޕީއެންސީގެ މައި ޖަގަހަ "ޕީއެންސީ ހައުސް" ހުޅުވުމުގެ ރަސްމިއްޔާތުގައި ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއަރޕާސަން އަބްދުއްރަހްމާން ދެއްކެވި ވާހަކަތަކަށް ޕީއެންއެފްގެ ސެކްރެޓަރީ ޖެނެރަލް މުހައްމަދު މަލީހް ޖަމާލް ފާޑު ވިދާޅުވެއްޖެއެވެ.

މިގޮތުން ތައުލީމު އުނގެނުމަކީ ބޭކާރު ކަމެއްގެ ގޮތުގައި ސިފަކޮށް އަދުރޭ ވާހަކަދައްކާފައިވުމުން ތައުލީމާއި ގުޅުވާ އަދުރޭއަށް ވާހަކަދެއްކޭނެ ޖާގައެއް ނެތް ކަމަށް މަލީހް ވަނީ ވިދާޅުވެފައެވެ. އަދުރޭގެ ދަރިކަލުން ފައިސަލް އިބްރާހީމް އަކީ އެއްވެސް ގާބިލްކަމެއް ނެތް ފަތުރުވެރިކަމުގެ ވުޒާރާގެ މިނިސްޓަރ ކަމަށް ކުފޫ ހަމަނުވާ ބޭފުޅެއް ކަން މިއަދު މުޅި ދިވެހިރާއްޖެ ގަބޫލުކުރާނެއެވެ. ބައްޕަގެ ސިޔާސީ ނުފޫޒުން މަގާމު ހޯދައިގެން އޭގެ ހިތި ނަތީޖާ އުފުލަން ޖެހިފައިވަނީ ނިކަމެތި ރައްޔިތުންނަށެވެ.

މީގެ އިތުރުން ރޭގެ ޖަލްސާގައި ވާހަކަދައްކަވަމުން އަދުރޭ ވަރުގެ ސިޔާސީ ގޮތުން ބާރުވެރި ދެވަނަ އެހެން މީހެއް ސިޔާސީ މައިދާނުގައި މިހާރު ނެތް ކަމަށް ސިފަކޮށް އަދުރޭ ވަނީ ވާހަކަދައްކަވާފައެވެ.

މީގެ އިތުރުން އަދުރޭ ފާހަގަކޮށްފައިވާ ގޮތަށް ހަމަރަނގަޅަށް ވެސް ތެދާއި ދޮގު ދިވެހި ރައްޔިތުންނަށް މިހާރު ފަހުމް ވެއްޖެއެވެ. ކުރިން ކަން ހިނގި ގޮތާއި މިހާރު ހިނގާ ގޮތް ރައްޔިތުންނަށް ވަރަށް ސާފުވެއްޖެ ކަމަށް މަލީހް ފާހަގަކޮށްފައިވެއެވެ.

ރައީސް ޔާމީންގެ ފަހަތްޕުޅުގައި އެންމެ އަރިސްކޮށް މަސައްކަތް ކުރައްވަމުން އާރާއި ބާރުގެ ދަހިވެތިކަމުގައި އެމަނިކުފާނު އެއް ފަރާތްކޮށް މިހާރުގެ ރައީސް ޑރ މުއިއްޒު އާއި ވަނީ ބައިއަތު ހިފާފައެވެ. ރޭގެ ޖަލްސާގައި ވާހަކަދައްކަވަމުން އަދުރޭ ވަނީ ރައީސް ޔާމީނަށް ވަރަށް ބޮޑަށް ފާޑުވިދާޅުވެ ވާހަކަ ދައްކަވާފައެވެ. މިގޮތުން އެމަނިކުފާނުގެ ވެރިކަން ގެއްލުނީ ކޮރަޕްޝަން އަށް އާނބަސް ބުނުމުން ކަމަށް އަދުރޭވަނީ ގޮވާލާފައެވެ.

އަދުރޭގެ ހުރި އަޚްލާގީ ސުލޫކާއި ތައުލީމާއި އަދި ގާބިލުކަން ވެރިކަމަށް މިވީ 7 މަސް ދުވަހު ރައްޔިތުންނަށް ވަރަށް ކައިރިން ފެނި، މި ވެރިކަމަށް އާނ އެކޭ ބުނެވުނީތީ ހިތާމަކުރާކަން ސޯޝަލް މީޑިޔާގެ އެކި ޕްލެޓްފޯމްތަކުގައި އާންމުން އަންނަނީ ޝުއޫރު ފާޅުކުރަމުންނެވެ.