އިންޑިއާގެ ބޮޑުވަޒީރު ނަރެންދުރަ މޯދީ 3 ވަނަ ދައުރަކަށް ހުވާކުރެއްވި ރަސްމިއްޔާތުގައި ބައިވެރިވެވަޑައިގަތުމަށް ރައީސް ޑރ. މުހައްމަދު މުއިއްޒު ކުރެއްވި ދަތުރަށް ދައުލަތުގެ ބަޖެޓުން 1.4 މިލިއަން ރުފިޔާ ހަރަދުކޮށްފައިވާކަން ހާމަވެއްޖެއެވެ.

މި މަހުގެ 9 ވަނަ ދުވަހު އޮތް ރަސްމިއްޔާތަށް ވަޑައިގަންނަވަން ރައީސް މުއިއްޒު ކުރެއްވި ދަތުރުގެ ތަފުސީލް ރައީސް އޮފީހުން ހާމަކޮށްފައިވަނީ މިއަދުއެވެ.

އެގޮތުން ކުރިން އެކި ހަރަދުތަކަށް ވަކިން ހަރަދުވި މިންވަރު އާންމުކުރި ނަމަވެސް މިފަހަރު އާންމުކޮށްފައިވަނީ ޖުމްލަ އަދަދު އެކަންޏެވެ.

މި ދަތުރުގައި ރައީސް މުއިްޒާއެކު ރަސްމީ ވަފުދާއި ސަޕޯރޓް ސްޓާފުންގެ ގޮތުގައި 20 ބޭފުޅަކު ބައިވެރިވެވަޑައިގެންނެވި ކަމަށްވެއެވެ.

ދަތުރުގެ ޖުމްލަ ހަރަދަށް 1،440،170.33ރ. (އެއް މިލިއަން ހަތަރު ލައްކަ ސާޅީސް ހާސް، ސަތޭކަ ހަތްދިހަ) ރުފިޔާ ދައުލަތުން ހަރަދުވި ކަމަށް ރައީސް އޮފީހުން ވަނީ ބުނެފައެވެ.

އެއީ ބޮލަކަށް 72،000ރ. ކަން ފާހަގަކޮށްލެވެއެވެ.

މި ދަތުރަށް އިންޑިއާގެ ސަރުކާރުގެ ދައުވަތު ލިބިފައިވަނީ ވަގުތު ކުޑަތަން ވެފައިވަނިކޮށް ކަމުން ސަރުކާރުގެ ވަފުދުން އިންޑިއާއަށް ވަޑައިގެންފައިވަނީ ލަންކާ އަދި ދުބާއީ މަގުން ކަމަށް ވެސް ރައީސް އޮފީހުން ވަނީ ބުނެފައެވެ.

އަދި ގައުމުތަކުގައި ޓްރާންސިޓުގައި ގިނަ ވަގުތުތަކެއް ހޭދަވި ކަމަށް ވެސް ރައީސް އޮފީހުން ވަނީ ހާމަކޮށްފައެވެ.

އިގްތިޞާދީ ގޮތުން އަނދަވަޅެއްގައި އޮއްވާ ދައުލަތުން ބޮޑު ހޭދައެއް ކޮށްގެން އިންޑިޔާގެ ބޮޑު ވަޒީރު މޯދީ ހުވާކުރެއްވުމުގެ ރަސްމިއްޔާތަށް ރައީސް މުއިއްޒު ވަޑައިގަތުމުން ގިނަ ބަޔަކު އަންނަނީ ފާޑުކިޔަމުންނެވެ.