މަސްވެރިންގެ އަތުން ގަނެފައިވާ މަހަށް ފައިސާ ނުދީ ގިނަ ދުވަސްވެފައިވާ މައްސަލަ ހައްލުކުރުމަށް ގޮވާލާ ރައްޔިތުންގެ މަޖިލީހަށް މިއަދު ކުއްލި މައްސަލައެއް ހުށަހަޅައިފިއެވެ.

މަޖިލީހަށް މި ކުއްލި މައްސަލަ ހުށަހެޅުއްވީ މަރަދޫ ދާއިރާގެ އެމްޑީޕީ މެމްބަރު އަހުމަދު ދީދީ އެވެ.

ދީދީ މި މައްސަލަ މަޖިލީހަށް ހުށަހަޅުއްވާފައި މިވަނީ މިފްކޯއަށް ކިރާފައިވާ މަހަށް ފައިސާ ނުދީ ދެ މަހަށް ވުރެ ގިނަ ދުވަސްވެފައިވާ ކަމަށް ބުނެ އައްޑޫގައި މަސްވެރިން މުޒާހަރާ ކުރަމުން ގެންދާތީކަން ފާހަގަކޮށްލެވެއެވެ.

މައްސަލައިގައި މިކަން ފާހަގަކުރަައްވަމުން ދީދީ ވިދާޅުވީ މިފްކޯއަށް ކިރާ މަހަށް 48 ގަޑިއިރުގެ ތެރޭގައި ފައިސާ ދޫކުރުމަކީ ސަރުކާރުގެ ވައުދެއް ކަމަށެވެ.

ނަމަވެސް އެކަން ނުވެ މަސްވެރިންނާއި މަސްވެރިންގެ އާއިލާތަކުގެ ހަރަދުތައް ނުކުރެވޭ ހިސާބަށް ގޮސް މަސްވެރިކަމަށް ބަރޯސާވާ ރަށްރަށުގެ އިގުތިޞާދު ހުއްޓުމަކަށް އައިސްފައިވާ ކަމަށް ވެސް ދީދީ ވަނީ ވިދާޅުވެފައެވެ.

ކުށްލި މައްސަލައިގައި ދީދީ ވަނީ 3 ކަމެއް ފާހަގަކުރައްވާފައެވެ.

އެއީ މަސްވެރިން ކުރަމުންދާ އިހުތިޖާޖަށް ފުލުހުންނާއި ސިފައިން ހުރަސް ނޭޅުމަށާއި، މަސްވެރިންނަށް ދޭން ޖެހޭ ފައިސާ މިހާރުންމިހާރަށް ހަމަޖައްސައިދިނުމަށާއި، މަސްވެރިންނަށް ފައިސާ ނުލިބި ލަސްވާ މައްސަލައަށް ދާއިމީ ހައްލެއް ހޯދައިދިނުން ކަން ފާހަގަކޮށްލެވެއެވެ.

މަޖިލީހުން މި މައްސަލަ ބަލައިގަތީ ވޯޓުގައި ބައިވެރިވި 74 މެމްބަރުންގެ އިއްތިފާގުންކަން ފާހަގަކޮށްލެވެއެވެ.

މި މައްސަލައަށް ބަހުސް ކުރަމުން ސަރުކާރުގެ މެމްބަރުން ވަނީ މަސް ގަންނަ އަގު ހެޔޮ ކުރުމަށް ގޮވާލާފައެވެ.