މަސްވެރިންނަށް ވަގުތުން ވަގުތައް ފަައިސާ ނުދެވެނީ ކުންފުނި މާލީގޮތުން ބޮޑު ބުރަ ހާލަތެއްގައި އޮތުމުން ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އިން އާންމުކުރި މައުލޫމާތުން ހާމަވެެއްޖެއެވެ.
މިކަން ހާމަކޮށްފައިވަނީ މިފްކޯގެ މާލީ ހާލަތާއި ގުޅޭގޮތުން އެ ކުންފުނިން މިއަދު ނެރުނު ބަޔާނުގައެވެ.
އެގޮތުން މިފްކޯގެ އޮޕަރޭޝަންތައް ކުރިއަށް ގެންދިއުމަށް މިވަގުތަށް ބޭނުންވާ ހަކަތައާއި ގާބިލްކަން ކުންފުނީގައި ހުރި ނަމަވެސް ދަރަނީގައި ކުންފުނި އެތައް އަހަރެއް ވަންދެން ހިންގުމުގެ ސަބަބުންނާއި، ކުންފުނި މާލީގޮތުން ސަރުކާރުގެ އެހީއަށް ބަރޯސާވާންޖެހޭ ގޮތަށް ބައްޓަންކޮށްފައި އޮތުމުގެ ސަބަބުން ކުންފުނި އޮތީ މާލީގޮތުން ބޮޑު ބުރައެއް އުފުލަން ޖެހިފައި ކަމަށް އެ ބަޔާނުގައި ވަނީ ބުނެފައެވެ.
އަދި އަވަސް ފިޔަވަޅުތަކެއް އަޅައިގެން ކުންފުނީގެ މިސްރާބު ބަދަލުކުރަން ޖެހިފައިވާ ކަމަށް ވެސް ބަޔާނުގައި ވަނީ ހާމަކޮށްފައެވެ.
އެކިއެކި މާލީ އިދާރާތައް މެދުވެރިކޮށް 2020 އިން 2022 އަށް ކޭޝް ފްލޯ ހަމަޖެއްސުމަށް މިފްކޯއަށް ދީފައިވާ ލޯނުތަކުގެ އަދަދު 645 މިލިއަން ރުފިޔާއަށް އަރައެވެ.
އެ ލޯނުތަކުގެ އިންޓްރެސްޓަށް އަހަރަކު 40 މިލިއަން ރުފިޔާ ހޭދަވާ ކަމަށް އެ ކުންފުނިން ވަނީ ބުނެފައެވެ.
