ރާތާގާބުރި އަޅުވައިގެން މަސްކިރާ އެއްޗެއްސެއް މިހާރު ނުހުންނާނެ ކަމަށް ރައީސް އަބްދުﷲ ޔާމީން އަބްދުލްޤައްޔޫމް ވިދާޅުވެއްޖެއެވެ.

ޕީޕަލްސް ނެޝަނަލް ފްރޮންޓު (ޕީއެންއެފް)ގެ ފޯރިގަދަ ޖަލްސާގައި އެ ޕާޓީގެ ރައީސް، ރައީސް ޔާމީން ވިދާޅުވީ މިއީ ތަރައްގީ ވެފައިވާ ޒަމާނެއް ކަމަށެވެ. އަދި ދުނިޔޭގެ ހުރިހާ ހިސާބެއްގައިވެސް މަސް ކިރަނީ ޑިޖިޓަލް ކައްޓާއިން ކަމަށެވެ.

ރައިސް ޔާމީން ވިދާޅުވީ ކުރީގައި މަސް ގަންނަނީ މިފކޯއިން ކަމަށެވެ. އަދި މިއީ ރައްޔިތުން ދެކޭ ގޮތުގައި މަސްވެރިންނަށް ސަރުކާރުން އަދާކުރާ ޒިންމާއެއް ކަމަށެވެ.

ނަމަވެސް ދެން ފެނިގެންދިޔައީ ވަޒީރުން ވާނުވާ ނުބައްލަވާ ރާއްޖެތެރެ ޒޯނުތަކަކަށް ބަހާލުމަށް ފަހު ޕްރައިވެޓް ސެކްޓާ އަދި ސަރުކާރުން މަސް ގަންނަ ގޮތަށް ބަދަލުކުރި މަންޒަރުކަމަށެވެ.

އިތުރަށް ރައީސް ޔާމީން ވިދާޅުވީ މިފްކޯގައި ހުރި ވަސީލަތްތައް އައު ނުކުރެވެނީ އެ މީހުންނަށް ވިޔަފާރި ޕްލޭންކޮށް ފޯކާސްޓު ކުރާނެ ވެއްޓެއް ނުލިބޭތީކަމަށެވެ. މިކަން މިފަދައިން ވެފައި މިއޮތީ ސަރުކާރުގެ އިހުމާލުން ކަމަށް ރައީސް ޔާމީން ވިދާޅުވިއެވެ.