މި އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލިސް އިންތިހާބުގެ ވޯޓާސް ލިސްޓަށް ޝަކުވާ ހުށައެޅުމުގެ ވަގުތު ހަމަވި އިރު 746 ޝަކުވާ އެއް ހުށައަޅާފައިވާ ކަމަށް އިލެކްޝަން ކޮމިޝަން ( އީސީ ) އިން ހާމަކޮށްފި އެވެ.

މަޖިލިސް އިންތިހާބުގައި ވޯޓު ދިނުމުގެ ހައްގު ލިބިފައިވާ މީހުންގެ ލިސްޓު އާންމުކޮށް ޝަކުވާ ހުށަހެޅުމަށް ހުޅުވާލައިފާ ވަނީ މި ހިނގާ ޖެނުއަރީ މަހުގެ 10 ވަނަ ދުވަހުއެވެ.

އީސީއިން ބުނެފައިވާ ގޮތުގައި އާދިއްތަ ދުވަހުގެ 15:00 އާ ހަމައަށް އެ މުއްދަތު ހަމަވެފައިވާ އިރު އެ ލިސްޓަށް ޖުމްލަ 746 ޝަކުވާ ހުށަހަޅާފައިވާ ކަމަށެވެ. އެގޮތުން އިއްޔެ އެކަނި ވެސް 330 ޝަކުވާ ހުށަހަޅާފައި ވާ ކަމަށް އީސީން ހާމަ ކުރެއެވެ.

އީސީ އިން ބުނީ ހުށައަޅާފައިވާ ޝަކުވާ ތަކުގެ ތެރޭގައި އެންމެ ގިނައީ އެޑްރެސް ބަދަލުވެގެން ހުށައަޅާފައިވާ ޝަކުވާތައް ކަމަށާއި އެޑްރެސް ބަދަލުވެގެން 450 ޝަކުވާ ހުށަހަޅާފައިވާ ކަމަށް އެ އިދާރާއިން ހާމަކުރެއެވެ.

މީގެއިތުރުން މަރުވެފައިވާ މީހުން ލިސްޓުގައި ހިމެނޭތީ 225 ޝަކުވާ ހުށައަޅާފައިވާ އިރު ވޯޓުލާ ދާއިރާ ބަދަލުވެގެންވެސް 40 ޝަކުވާއާއި ލިސްޓުގައި ނަން ނެތުމުން 5 ޝަކުވާގެ އިތުރުން އައިޑީކާޑު މައުލޫމާތު ބަދަލުވެގެން އެއް ޝަކުވާ ހުށަހެޅިފައި ވައި ކަމަށް އީސީ އިން މައުލޫމާތު ދެއެވެ.

ރައްޔިތުންގެ މަޖިލިސް އިންތިހާބު ބާއްވަން ހަމަޖެހިފައިވަނީ އަންނަ މާޗުމަހުގެ 17 ވަނަ ދުވަހުއެވެ. އެ ދުވަހުގެ ނިޔަލަށް 18 އަހަރުފުރޭ މީހުންނާއެކު ޖުމްލަ 284327 މީހުންނަށް މި އިންތިހާބުގައި ވޯޓު ލުމުގެ ހައްގު ލިބިގެން ވާކަމަށް އިލެކްޝަން ކޮމިޝަނުން ހާމަ ކުރެއެވެ.