ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ފެނުމުގެ ނުކުޅެދުންތެރިކަން ހުންނަ މީހުން އެހެން މީހެއްގެ އެހީތެރިކަމާ ނުލައި ވޯޓު ކަރުދާހުގައި ފާހަގަ ޖެހުމަށްޓަކައި، ޓެމްޕްލޭޓް ބޭނުން ކޮށްގެން ވޯޓުލާން ރެޖިސްޓަރ ވުމުގެ ފުރުސަތު ހުޅުވާލައިފިއެވެ.

ފެނުމުގެ ނުކުޅެދުންތެރިކަން ހުންނަ ފަރާތްތަކަށް ވޯޓުލުމަށް ބޭނުންވާ އިންތިޒާމްތައް ހަމަޖެއްސުމުގެ ގޮތުން ޓެމްޕްލޭޓް ބޭނުންކޮށްގެން ވޯޓުލުމަށް އެދޭ ފަރާތްތައް 2024 ޖެނުއަރީ 21 ވާ އާދީއްތަ ދުވަހުން ފެށިގެން 2024 ފެބުރުވަރީ 4 ވާ އާދީއްތަ ދުވަހުގެ ނިޔަލަށް، 1414 އަށް ގުޅައިގެން ރަޖިސްޓަރީކުރުމަށް އެ އިދާރާއިން ވަނީ އެދިފައެވެ.

ފެނުމުގެ ނުކުޅެދުންތެރިކަން ހުން ފަރާތްތަކަށް، އެހީތެރިއަކާއި ނުލައި، ޓެމްޕްލޭޓް ބޭނުންކޮށްގެން އަމިއްލައަށް ވޯޓުލުމުގެ ފުރުސަތު އެންމެ ފުރަތަަމަ ލިބިގެން ދިޔައީ ނިމިދިޔަ ރިޔާސީ އިންތިޚާބުގައިކަން ފާހަގަކޮށްލެވެއެވެ.

އެ ފުރުސަތު އެފަރާތްތަކަށް ފަހިވެގެންދިޔައީ، އެފަދަ ފަރާތްތަކުގެ ހައްގުގައި މަސައްކަތް ކުރާ "ބްލައިންޑް އެސޯސިއޭޝަން" ގެ ބޭފުޅުން، ސިޔާސީ ޕާޓީ ތަކާއި، އީސީ އާއި ސަރުކާރުގެ ކަމާއި ގުޅޭ އިދާރާ ތަކާއި ބައްދަލުކޮށް ކުރި މަސައްކަތާއި އެކު، މަޖިލީހުގެ ތެރެއިން، އިންތިޚާބާއި ގުޅޭ ގާނޫނަށް ބަދަލުގެނެވިގެންނެވެ.

ކުރިއަށް އޮތް މަޖިލިސް ވެގެންދާނީ، ލޮލަށް ފެނުމުގެ ނުކުޅެދުންތެރިކަން ހުންނަ ފަރާތްތަކަށް އެހެން މީހެއްގެ އެހީއާއި ނުލައި ވޯޓުލެވޭ ފުރަތަމަ މަޖިލިސް އިންތިހާބަށެވެ.