ވައުދާ ހުވާކުރުމަކީ ވަރަސްވެސް ފަސޭހަ ކަމެކެވެ. ނަމަވެސް އެ ވައުދުތަކާ އަހުދުތަކާ އެއްގޮތަށް ޢަމަލުކުރުމަކީ އެއީ ގިނަ ފަހަރު އޮންނަނީ އުނދަގޫ ކަމަކަށްވެފައެވެ. މި ކުޅިވަރު ރާއްޖެއިން ކޮންމެ ފަސް އަހަރަކުން އައުވާ މަންޒަރު ފެންނަމުން ދެއެވެ.

އަޅުގަޑު ދައްކަން މިއުޅޭ ވާހަކަ ކިޔުންތެރިންނަށް ފަހުމުވާނެކަން ޔަގީނެވެ. އާދޭހެވެ. ދައްކަން މިއުޅެނީ ކޮންމެ ފަސް އަހަރަކުން ވެރިމީހާ ކަނޑައަޅަން ނަގާ ވޯޓާ ދިމާކޮށް ސިޔާސީ ވެރިން ރައްޔިތުންނަށް ބާލާ ތަރިރު ހަނދުގެ ވާހަކައެވެ.

އެގޮތުން ރައްޔިތުންނަށް ނުވިހާ ކުއްޖާގެ ފޫޅަށް ދާންދެން ގެނެސްދޭނެކަމުގެ ވައުދުވެއެވެ. އަދި އޭރަކު އޮންނަ ސަރުކާރަކުން ކޮށްފައި ހުންނަ ނޭދެވޭ ކަންކަމާ ދެކޮޅަށް ވާހަކަ ދައްކާ ރައްޔިތުންގެ މެދުގައި ނުތަނަވަސްކަން އުފައްދާ ރައްޔިތުންގެ ހިތްތަކުގެ އެންމެ ހިމަ ނާރަށްވެސް އަސަރުކުރުވައެވެ.

އެގޮތުން ނިމިދިޔަ އަހަރަކީ އެ ސިލްސިލާއަށް އައު ބޮޅެއް އިތުރުވި އަހަރެކެވެ. ރައްޔިތުންނަށް ދިމާވި ދަތި އުނދަގޫ ފަސް އަހަރަށް ފަހު ރިޔާސީ އިންތިހާބެއް މެދުވެރިވިވުމުގެ އެންމެ ފައިދާ ނެގީ އޭރުގެ އިދިކޮޅުންނެވެ. އަދި އޭރު އިދިކޮޅު ސިޔާސީ ހަަމއެކަނި ލީޑަރަށް ދެމުން ގެންދިޔަ އަނިޔާތަކުގެ އެޑްވާންޓޭޖުވެސް ނަގައި އޭރުގެ ޕީޕިއެމް ޕީއެންސީއިން ރިޔާސީ އިންތިހާބަށް ކަމަރު ބަނދެލީ ރައްޔިތުން ލޮލުގައި އަނދުނުގެ ފަލަ ކޫރުމެއް ދަމަމުންނެވެ.

ގިނަ ވައުދުތަކެއް، ރައީސް އަބްދުﷲ ޔާމީންގެ މެނިފެސްޓޯއިން ވަގަށް ނަގައިގެން ރައްޔިތުންނަށް ވިއެވެ. އެކަންކަމާ މެދު ރައްޔިތުން ސުވާލު ނުއުފެއްދުމަށް އެދުނެވެ. ރައްޔިތުން އެ ބަސްތަކަށް އިތުބާރު ކުރިއެވެ. ރައީސް ޔާމީންގެ ފަރާތުން އަައި ބަޔަކަށް ވެފައި އެމަނިކުފާނުގެ ފަސް އަހަރު ރައްޔިތުންގެ ދިރިއުޅުމަށް އައީ ހެޔޮ ބަދަލުކަމަށްވުމުންނެވެ.

ވެރިކަން ފުރޮޅި ހަތް މަސް ފުރި އަށް މަހަށް ލީއިރު ނަމަވެސް ކަމަކު ދާކަށް ނެތެވެ. ރައީސް މީހާ ދެއްކެވި ހުރިހާ ވާހަކައެއް ފެން ބޮތްކަށް ވެއްޖެއެވެ. ޖަމަލު ފޮނޑިއަށް ވެއްޖެއެވެ. ރައްޔިތުންގެ އިތުބާރު ގެއްލިއްޖެއެވެ. ނުހަނު ފޮނި އުއްމީދާ އެކު ސަރުކާރު ގެނައި މީހުން މާޔޫސްވެއްޖެއެވެ.

މައިގަނޑު ސަބަބަކީ ކުރިންވެސް ދެންނެވި ފަދައިން ރައީސް މީހާގެ ބަހާ އަމަލާ ދިމާނުވުމެވެ. އެގޮތުން ރައްޔިތުންނަށްވީ ވައުދުތައް، ވައުދަކަށް ފަހު ވައުދެއް އުވެމުން ދަނީއެވެ. އެންމެ ފުރަތަމަ ރައީސް ޔާމީން މިނިވަންކުރަން ވިވައުދެވެ. ދެން މަސްވެރިންނަށް ވީވައުދެވެ. ދެން ތަކެތީގެ އަގު ބޮޑު ނުކުރާނެ ކަމަށްވީ ވައުދެވެ. ދެން ގައުމުގެ ދަރަނި އިތުރުނުކުރާނެކަމަށް ވީ ވައުދެވެ. ދެން ދައުލަތުގެ އާމްދަނީ އިތުރުކުރަން ރައްޔިތުން އަތުން ނަގާ ޓެކްސް ބޮޑު ނުކުރާނެކަމަށް ވީ ވައުދެވެ. އިންޑިއާ އައުޓު ކުރަން ވީ ވައުދުތައްވެސް އޮތީ ހަމަ އޮތް ގޮތަށެވެ. މިހެން ގޮސް މި ލިސްޓު އިރު އަރަންދެން ވެސް ކީދާނެއެވެ.

ރައީސް މުއިއްޒަކީ ގަޑިން ގަޑިއަށް ނަމާދުކުރައްވާ ދީނީ ބޭފުޅެއްކަމަށް "ސަރުކާރުގެ ޓްވީޓު ޓީމުން" ބުނި ނަމަވެސް އެމަނިކުފާނުގެ އަމަލުފުޅުތައް އެކަމާ ހާސް ބައި ތަފާތެވެ. މަންޒަރުތަކުން މިދަނީ އެކަން ހާމަވަމުންނެވެ.

އެންމެ ފަހުން އެމަނިކުފާނު ޕޯޑިއަމެއްގައި ދެއްކެވި ވާހަކަފުޅުގައިވެސް ވިދާޅުވީ، މިހާރު އިދިކޮޅުން ކުރާ ކަމަކީ ދޮގުތައް ފެތުރުން ކަމަށެވެ. ނަމަވެސް އެމަނިކުފާނުގެ އެދުމަކީ ސަރުކާރުގެ ވެރިން އެއްވެސް ފޮރުވުމެއް ނެތި ހާމަކަން ބޮޑުކޮށް ރައްޔިތުންނަށް ކަންކަން އޮޅުން ފިލުވައިދިނުން ކަމަށް އެމަނިކުފާނު ވިދާޅުވިއެވެ.

މިހެން އެމަނިކުފާނު ވިދާޅުވިއިރު "ދޮގު" ހެދުމުގެ ލިސްޓުގައި އެންމެ ކުރީގައި މިހާރު އޮތީ އެމަނިކުފާނުގެ ނަންފުޅުކަމެއް އެމަނިކުފާނަށް އެނގިވަޑައިނުގަންނަވަނީބާއެވެ.

ރައްޔިތުންނަށްވީ ވައުދުތަކާ ޚިލާފުވަމުން ދާތީ ރައްޔިތުން ގެންދަނީ އެމަނިކުފާނަކީ ދޮގުވެރިއެއްގެ ގޮތުގައި ލޭބަލުކުރަމުންނެވެ. އެހެންމީހުން ދޮގު ހަދާކަމަށް ތުހުމަތުކުރައްވަމުން އިނގިލި ދިއްކުރައްވާއިރު ބާކީ އިން ތިން އިނގިލި އިނީ ތިމަން މަނިކުފާނާ ދިމާއަށް ކަމެއް ފަހަރުގައިވެސް ހަނދުމަ ނެތީކަން ނޭނގެއެވެ.

ކޮންމެ އަކަސް މިއަދު މިފެންނަނީ ހައިވަކަރު އޮޑި ނަން ވާ މަންޒަރެވެ. އެމްޑީޕީއަކީ އަބަދުވެސް ދޮގު ހަދާ ވެރިން ތިބޭ ޕާޓީއެއްގެ ގޮތުގައި ލޭބަލްވެފައި އޮތް ޕާޓީއަކަށްވުމުން ރައީސް މުއިއްޒުގެ ތުހުމަތު އެ ޕާޓީއަށް އިދިކޮޅު ފަރާތްތަކޭ ވިދާޅުވެ އަމާޒުކުރެއްވީތާއެވެ.

ނަމަވެސް އަސްލު ހަގީގަތަކީ މިއަދު ރައީސް މުއިއްޒުގެ އިތުބާރު ގެއްލި ރައްޔިތުން އެމަނިކުފާނަށް ކުރި އިހްތިރާމުވެސް ގެއްލެމުންދާ ކަމެވެ. މިހެން ދެންނެވީމާ ސަރުކާރުގެ ދިފާއުވެރިން ރަތަށް އަރާނެއެވެ. ނަމަވެސް މިއީ ޙަގީގަތެވެ. ވަޒީފާގެ ބިރަށް މިކަން ހާމަނުކުރި ނަމަވެސް މިއީ މިއަދު ދެބަސް ވެެވެން ނެތް ހަގީގަތެކެވެ.

ވައުދާ ހުވާކުރައްވާ އެ ހަނދާން އެމަނިކުފާނު ނައްތާލައްވައިފިއެވެ.