ގައިދީންނަށް މޮބައިލް ފޯނާއި މަސްތުވާތަކެއްޗާއި އެހެނިހެން ތަކެތި ފޯރުކޮށްދެމުން ދިޔަ ކަމުގެ ތުހުމަތު ކުރެވޭ ކަރެކްޝަންސް އޮފިސަރުންތަކެއް ހައްޔަރުކުރުމަށްޓަކައި ބޮޑު އޮޕަރޭޝަނެއް ފަށާފައިވާ ކަމަށް ފުލުހުންގެ ހިދުމަތުން ބުނެފިއެވެ.

ފުލުހުން މިފަދައިން ބުނެފައިވަނީ ހޯމްލޭންޑް މިނިސްޓްރީ އާއެކު ގުޅިގެން ކުރިޔަށް ގެންދިޔަ ނޫސްވެރިންގެ ބައްދަލުވުމުގައިއެވެ.

އެގޮތުން ފުލުހުން ބުނީ މި މައްސަލައިގައި ހިމެނެނީ 18 ކަރެކްޝަންސް އޮފިސަރުން ކަމަށެވެ. އަދި އެއީ ރޭންކުގެ ގޮތުން ބަލާނަމަ ޖޫނިއާރ ރޭންކުގެ އޮފިސަރުން ކަމަށެވެ.

އަދި ތަހުހީގުގެ މިހާތަނަށް ސީނިއާރ އެއްވެސް އޮފިސަރެއްގެ މައްޗައް ތުހުމަތު ކުރެވިފައިނުވާކަމަށް ވެސް ހޯމް މިނިސްޓާރ އަލީ އިހުސާން ވަނީ ވިދާޅުވެފައެވެ.

އަދި އޭގެއިތުރުން މިދިޔަ އަހަރު އެކަނި 73.3 މިލިއަން ރުފިޔާ ޖަމާކޮށްފައިވާކަމަށް ވެސް ވަނީ މައުލޫމާތުދީފައެވެ.

އަދި އެ އޮފިސަރުންގެ ތެރެއިން އެއް އޮފިސަރުގެ އެކައުންޓެއް އަހަރެއްގެ ތެރޭގައި 24 މިލިއަން ރުފިޔާ ޖަމާކޮށްފައިވާކަމަށް ވެސް ވަނީ ފުލުހުން ބުނެފައިވެއެވެ.

އަދި އޮޕަރޭޝަނުގައި ބައެއް ކަރެކްޝަންސް އޮފިސަރުން ހައްޔަރުކޮށްފައިވާ ކަމަށާއި އަދި ކުރިއަށް އޮތް ތަނުގައި އޮޕަރޭޝަން ކުރިއަށްދާ ގޮތުގެ ތަފުސީލުތައް ދެމުން ދާނެ ކަމަށް ވެސް ފުލުހުން ވަނީ ހާމަކޮށްފައެވެ.