ޣައްޒާ ސިޓީގެ ޝުޖާޔާ އަވަށަށް އިސްރާއީލުގެ ނިރުބަވެރިން ދިން ޙަމަލާގެ ސަބަބުން މަދުވެގެން 60،000 މީހުންގެ ގެދޮރު ގެއްލުވާލައިފިއެވެ.

ޝުޖާޔާ އަވަށުގައި އިސްރާއީލު ސިފައިންގެ ހަތަރު މީހަކު މަރާލާފައިވާ ކަމަށާއި އަދި ފަސް ހަނގުރާމަވެރިޔަކު ޒަހަމްވެފައިވާ ކަމަށް މީޑިއާ ރިޕޯޓްތައް ބުނެއެވެ. ހަމާސް އިން ބުނީ އެ ސަރަހައްދުގައި އިސްރާއީލު ސިފައިންނާއި ކުރިމަތިލުންތަކެއް ހިނގަމުން ދާ ކަމަށެވެ.

އދ. ގެ ތަރުޖަމާނު ސްޓެފަން ޑުޖާރިކް ވިދާޅުވި ގޮތުގައި ޣައްޒާގެ ދެކުނުގެ އަލްމަވާސީ ސަރަޙައްދުގައި އިސްރާއީލުން ހިންގި އަސްކަރީ އޮޕަރޭޝަންތަކުގެ ނަތީޖާއެއްގެ ގޮތުން 5000 މީހުން ގެދޮރު ގެއްލި އެތައް ބަޔަކު ޒަޚަމްވެފައިވެއެވެ.

އިސްރާއީލުން ޣައްޒާގެ މީހުން ދިރިއުޅޭ ގެތަކަށް ރޭގަނޑުގެ ކަނު އަނދިރީގައި ދިން ނިރުބަވެރި އެ ހަމަލާތަކުގައި ހަތަރު ކުޑަކުދިންނާއެކު ހަ މީހަކު ޝަހީދުވެ 15 މީހުން ޒަޚަމްވެފައިވެއެވެ. ފަލަސްތީނުގެ ވަފާ ނިއުސްއިން ރިޕޯޓް ކޮށްފައިވާ ގޮތުގައި ޣައްޒާގެ މެދުތެރޭގެ މަޣާޒީ ރެފިއުޖީ ކޭމްޕަށް ދިން ހަމަލާއެއްގައި ވެސް ބަޔަކު ވަނީ ޝަހީދު ކޮށްލާފައެވެ.

އދ. އިން ބުނީ ފަލަސްތީނު ރެފިއުޖީންނާއި ޣައްޒާގެ ރައްޔިތުން ދިރިއުޅެމުން ދަނީ ބޮން އަޅާފައިވާ އިމާރާތްތަކާއި، ސުންނާފަތިވެފައިވާ ސަރަހައްދު ތަކުގެ ކައިރީގައި ހުންނަ ޓެންޓް ކޭމްޕްތަކުގައި ކަމަށާއި، ބަނޑުހައިހޫނުކަން އިތުރުވެ، ބަލިތައް ފެތުރިދާނެ ކަމުގެ ބިރު ބޮޑުވުމުގެ ސަބަބުން މީހުންގެ ފުރާނައަށް ނުރައްކާވާ ހިސާބަށް ގޮސްފައިވާ ކަމަށެވެ.

އޮކްޓޯބަރު މަހުގެ ހަތްވަނަ ދުވަހުން ފެށިގެން އިސްރާއީލުން ޣައްޒާގައި ކުރަމުންދާ ހަނގުރާމައިގައި މިހާތަނަށް 37،765 މީހުން ޝަހީދުވެ، 86،429 މީހުން ވަނީ ޒަޚަމްވެފަ އެވެ. ހަމާސް ޖަމާއަތުން އިސްރާއީލުގައި ދިން ހަމަލާތަކުގައި މަރުވި މީހުންގެ އަދަދު 1139 އަށް އަރާއިރު، ޣައްޒާގައި އަދިވެސް ބަޔަކު ބަންދުކޮށްފައި އެބަތިއްބެވެ.