20 ވަނަ ރައްޔިތުންގެ މަޖިލީހުގެ އިންތިޚާބާ ގުޅޭ ގިނަ ވަގުތީ ވަޒީފާތަކެއްގެ ފުރުސަތު އިލެކްޝަންސް ކޮމިޝަނުން ހުޅުވާލައިފިއެވެ.
އަންނަ މާޗް މަހުގެ 17 ވަނަ ދުވަހު ބާއްވާ 20 ވަނަ ރައްޔިތުންގެ މަޖިލީހުގެ އިންތިޚާބުގައި އިލެކްޝަންސް ކޮމިޝަނުގެ އިންތިޚާބީ އޮފިޝަލުން ތަމްރީންކުރުމަށް އަތޮޅުތަކާއި ސިޓީތަކުގައި ޓްރެއިނަރުންގެ ގޮތުގައި މަސައްކަތް ކުރާނެ 90 ޓްރޭނަރުންނާއި އިލެކްޝަންގެ އިތުރު އިދާރީ މަަސައްކަތްތަކަށް ބޭނުންވާ އިތުރު 50 ވަޒީފާއަށް އިލެކްޝަނުން ވަނީ ހުޅުވާލާފައެވެ.
ޓްރެއިނަރުންގެ ގޮތުގައި މަސައްކަތް ކުރުމަށް ބޭނުންވާ ފަރާތްތަކުން މިމަހުގެ 31 ވަނަ ދުވަހުގެ ކުރިން ޝައުގުވެރިކަން ފާޅުކޮށް އިލެކްޝަންސް ކޮމިޝަނަށް ފޯމް ހުށަހެޅުއްވުމަށް އިލެކްޝަނުން ކޮށްފައިވާ އިޢުލާނުގައި ވަނ ބުނެފައެވެ.
އަދި އިދާރީ ވަޒީފާތަކަށް ކުރިމަތިލުމުގެ ފުރުސަތު އަންނަ މަހުގެ 29 އާއި ހަމައަށް ހުޅުވާލެވިފައިވާ ކަމަށްވެސް އިޢުލާނުގައި ބުނެފައިވެއެވެ.
6000 އަށް ވުރެ ގިނަ އިލެކްޝަން އޮފިޝަލުން މަސައްކަތްކުރާނެ މިއިންތިޚާބުގައި ބަހައްޓާ ވޯޓްފޮށީގެ އަދަދުވެސް އިލެކްޝަނުން ވަނީ ގިނަކޮށްފައެވެ.
ރަމަޟާންމަހުގެ ތެރޭގައި އިންތިޚާބުގެ ވޯޓްލުން ކުރިއަށް ގެންދަން އިލެކްޝަން ކޮމިޝަނުން ނިންމާފައިވާއިރު, އެކޮމިޝަނުން ބުނެފައިވަނީ ރައްޔިތުންނަށް ވީހާވެސް ފަސޭހަ އިންތިޒާމްތަކެއް ހަމަޖައްސަން މަސައްކަތް ކުރާނެކަމަށެވެ.
