ރާއްޖޭގެ ދަރަނި ދެއްކޭނެ ފޯމިއުލާއާ ފައިސާވެސް އެމަނިކުފާނަށް ލިބިފައިވާ ކަމަށް ރައީސް މުހައްމަދު މުއިއްޒު ރިޔާސީ އިންތިހާބުގެ ތެރޭގައި ވިދާޅުވެފައި މިހާރު ރާއްޖޭގެ ދަރަނި ނުދެއްކިގެން ޚަރަދުތައް ކުޑަކުރުމުގެ ނަމުގައި މަގާމުތަކުން މީހުން ވަކިކުރުން ފަދަ ކަންްކަން ކުރަން އެމަނިކުފާނު ނިންމުމުން އަމާޒުވަމުންދާ ފާޑުކިޔުންތަކުން ރައީސް މުއިއްޒު ދިފާއު ކުރައްވަން މަޖިލީހުގެ ޕީއެންސީ މެމްބަރުން ނުކުމެއްޖެއެވެ.

މިއަދު ބޭއްވި މަޖިލީހުގެ ޖަލްސާގައި ސަރުކާރުގެ ފަރާތުން ފުނަދޫ ދާއިރާގެ މެންބަރު މުހައްމަދު މަމްދޫހް ހުށަހަޅުއްވާފައިވާ ދައުލަތުގެ ދަރަންޏާ ބެހޭ ބިލަށް ބަހުސްކުރައްވަމުން ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމު ދެއްކެވި ވާހަކަތަކަށް ރައްދު ދެއްވާ ސަރުކާރުގެ ތާއީދު އޮތް މެމްބަރުން ވަނީ ވާހަކަ ދައްކަވާފައެވެ.

އެގޮތުން އެމްޑީޕީ މެންބަރު މީކާއީލް އަހުމަދު ނަސީމް ވަނީ ވެރިކަން ލިބިވަޑައިގަތުމުގެ ކުރިން ދަރަނި މެނޭޖް ކުރެވޭނެ ކަމަށް ކެމްޕޭން ޖަލްސާއެއްގައި ރައީސް މުއިއްޒު ދައްކަވާފައިވާ ވާހަކަފުޅެއް ހަމަ އެގޮތަށް މަޖިލީހުގައި އިއްވާފަ އެވެ. 

ރައީސް މުއިއްޒު އޭރު ވިދާޅުވީ، "ކަންކަން ކުރެވޭ ވަރަށް ކޮންމެ މަހަކު ވަދޭ ފައިސާ. އަދި ދައްކަން ހުރި ލޯނުތަކަށް ފައިސާ ދެއްކޭގޮތަށް އަޅުގަނޑުމެންނަށް އެބަހުރި ފަހިވެފައި. މިހާރު ވެސް އަޅުގަނޑުމެންނާ ގާތް ރައްޓެހި ދިމަދިމާލުން އެބަހުރި ގްރީން ސިގުނަލް ލިބިފައި. ދައްކަން ހުރި ބޮޑެތި ބައެއް ލޯންތަކަށް ރީ ފައިނޭންސް ކުރެވޭނެ ގޮތްތައް ހުރީ ހަމަޖެހިފައި. އެހެންވީމާ އެއްވެސް ކަންބޮޑުވުމެއް ނެތް" މީކާއިލް ރައީސް މުއިއްޒުގެ ވާހަކަ ކޯޓްކުރައްވަމުން ވިދާޅުވި އެވެ. 

މީކާއިލް ވިދާޅުވީ، ދަރަނި އޮތްކަން އެނގިގެން އައި ސަރުކާރުން ބޭކާރު އެތައް ކަމެއް ކުރައްވާފައިވާކަމަށެވެ. އެކަންކަން ކުރައްވަނީ ހަމަ ހަގީގަތުގައި ވެސް ރާއްޖޭގެ މާލީ ހާލަތު ނޭނގޭތީތޯ ނުވަތަ ގަސްތުގައި، ރާއްޖެ އަނދަވަޅަކަށް ވައްޓާލުމަށްތޯ އޭނާ ސުވާލުކުރެއްވި އެވެ. 

ވެރިކަމަށް ވަޑައިގެން ދިވެހި ރާއްޖޭގެ މާލީ ކަންކަން މިހާ ރަނގަޅަށް މެނޭޖްކުރައްވަން ވިސްނަވައިގެން ހުންނަވާ އަނެއްކާވެސް 21 މިލިއަން ރުފިޔާއިން މުލީއާގެ މަރާމާތުކުރައްވަން ނިންމެވިކަމާ އަދަދު ނޭނގޭހާ ގިނައިން ސިޔާސީ މުވައްޒަފުން ސިޔާސީ މުވައްޒަފުން ނަގަމުން އައިކަން ވެސް މީކާއީލްގެ ވާހަކައިގައި ފާހަގަކުރެއްވިއެވެ. 

މީކާއިލްގެ ވާހަަކަ ކުރިއަށް ގެންދަނިކޮށް، ވެލިދޫ ދާއިރާގެ މެންބަރު މުހައްމަދު އައްބާސް ނިޒާމީ ނުކުތާއެއް ނަންގަވައި ވިދާޅުވީ، ދަރަނި މެނޭޖްކުރެވޭނެ ކަމަށް ރައީސް މުއިއްޒު އޭރު ވައުދުވެވަޑައިގަތީ އޭރުގެ ސަރުކާރުން ސިއްރުކޮށްފައިވާ  ކަންކަން ލޮލަށް ނުފެންނާތީ ކަމަށެވެ. 

ދެން ބަހުސްކުރެއްވި މަތިވެރި ދާއިރާގެ މެންބަރު ހަސަން ޒަރީރު ވިދާޅުވީ ގައުމު މިހާލަކަށް ގެނައީ އެމްޑީޕީއިން ވިސްނުމެއް ނެތި ކުރި ވެރިކަމުގެ ސަބަބުން ކަމަށެވެ. އެކި ދިމަދިމާއިން "ހެސްކިޔާފައި" ލޯނުތައް ނަގަމުން ދިޔަ ނަމަވެސް، ދައުލަތުގެ އާމްދަނީ އިތުރުކުރުމަށް ކުރިކަމެއް ނެތް ކަމަށް ވިދާޅުވި އެވެ. 


ދަރަންޏާ ބެހޭ ބިލުގެ ބަހުސްގައި ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވީ، ސަރުކާރުގެ ފަރާތުން ހުށަހެޅި މި ބިލަކީ ރައީސް އިބްރާހިމް މުހައްމަދު ސޯލިހު ފަދަ ވެރިއަކު ދެވަނަ ފަހަރަށް ރާއްޖޭގެ ވެރިކަން ކޮށްފާނެކަމުގެ ބިރަށް ހުށަހަޅާފައިވާ ބިލެއް ކަމަށެވެ.