މާފުށީ ޖަލަށް ގާނޫނާއި ގަވާއިދާއި ޚިލާފަށް ގައިދީންނަށް ފޯރުކޮށްދޭ މަނާ ސާމާނު ވެއްދުން ހުއްޓުވުމަށް މޯލްޑިވްސް ޕޮލިސް ސަރވިސް، ޑިފެންސް ފޯސް އަދި ކަރެކްޝަންސްެއިން ގުޅިގެން ހިންގަމުންދާ އޮޕަރޭޝަންގެ ކަންކަން ބައްލަވާލެއްވުމަށް ހޯމް މިނިސްޓަރ އަލީ އިހުސާން އަދި ޕޮލިސް އަދި ކަރެކްޝަންގެ ސީޕީ މާފުށްޓަށް ވަޑައިގަންނަވައިފިއެވެ.

މި އޮޕަރޭޝަންގައި މިހާތަނަށް 11 އޮފިސަރަކު ޝަރީއަތް ނިމެންދެން ބަންދު ކުރުމަށް ކްރިމިނަލް ކޯޓުން އަމުރުކޮށްފައިވެއެވެ. މި ނެޓްވޯކްގައި ކަރެކްޝަނަލް ސާވިސްގެ 18 މީހުން ހިމެނޭ އިރު، އޭގެ ތެރެއިން 13 އޮފިސަރުން ހައްޔަރު ކުރި އެވެ. މި ހުރިހާ އޮފިސަރުންނަކީ ޖޫނިއާ ރޭންކްގައި ހިމެނޭ އޮފިސަރުން ކަމަށް ފުލުހުން ބުނެފައިވެ އެވެ.

މިދިޔަ ބުރާސްފަތި ދުވަހުގެރޭ އިސްކަންދަރު ކޮށީގައި ބޭއްވި ޕްރެސް ކޮންފަރެންސްގައި އެސިސްޓެންޓް ކޮމިޝަނަރު އޮފް ޕޮލިސް އަބްދުﷲ ޝަރީފް ވިދާޅުވީ ފުލުހުންގެ އިންޓެލިޖެންސުން އެއްކުރި މައުލޫމާތުގެ އަލީގައި، މާފުށީ ޖަލުގައި ތިބޭ ގައިދީންނަށް ޑްރަގާއި ފޯނު ފޯރުކޮށްދިނުމުގައި ބައިވެރިވާ 18 މުވައްޒަފުންގެ އެކައުންޓްތަކަށް މިދިޔަ އަހަރެއްހާ ދުވަހުގެ ތެރޭގައި 73.6 މިލިއަން ރުފިޔާ ޖަމާވެފައިވާ ކަމަށެވެ.

ޖަލަށް ޑްރަގާއި ފޯނު ވެއްދުމުގައި ޖަލު އޮފިސަރުން އެހީތެރިވާ ކަމަށް ތުހުމަތު ކުރެވޭތީ ފުލުހުންގެ ބޮޑު އޮޕަރޭޝަން ފެށީ މިދިޔަ ހުކުރު ދުވަހުގެ ރެ އެވެ.