ބައިނަލްއަގްވާމީ އެއްބަސްވުމެއް ކަމަށްވާ އޯގަނައިޒޭޝަން އޮފް އެފްރިކަން، ކެރީބިއަން އެންޑް ޕެސިފިކް ސްޓޭޓްސް (އޯއޭސީޕީއެސް)ގެ "ސަމޯއާ އެގްރީމަންޓް" ގައި ބައިވެރިވާން ދިވެހި ސަރުކާރުން ނިންމާފައިވާއިރު ދީނީ ގޮތުން ފުށު އަރާ ކަންކަން އެ އެގްރިމަންތުގައި ހުރިކަން ފާހަގަވެއްޖެއެވެ.

"ސަމޯއާ އެގްރީމަންޓް" ގައި ބައިވެރިވާން ދިވެހި ސަރުކާރުން ނިންމާފައިވަނީ އިއްޔެ ބޭއްވި މަޖިލީހުގެ ޖަލްސާގައި އެގޮތަށް ފާސްކުރުމުންނެވެ. އަދި މިއަދު ދިވެހި ސަރުކާރުން ވަނީ އެ އެގްރިމަންޓުގައި ސޮއިވެސް ކޮށްފައެވެ.

މި އެގްރިމަންޓުގައި ސޮއިކޮށްފައިވާއިރު ރާއްޖެއަކީ ސައްތައިން ސައްތަ އިސްލާމީ ގައުމަކަށްވާއިރު ދީނީ ގޮތުން ހުއްދަ ނުކުރާ ބައެއް ކަންކަން އެ އެގްރިމަންޓުގައި އެބަހުއްޓެވެ.

އެގޮތުން މި އެއްބަސްވުމުގައި ހަ ދާއިރާއަކަށް ބިނާވެފައިވާ ގާނޫނީ އޮނިގަނޑު ހާމަކޮށްފައިވެއެވެ. އެއީ ހިއުމަން ރައިޓްސް އެންޑް ޑިމޮކްރަސީ، ޕީސް އެންޑް ސެކިއުރިޓީ، ޑިވެލޮޕްމަންޓް، އިކޮނޮމިކް ގްރޯތު، ކްލައިމެޓް ޗޭންޖް އަދި މައިގްރޭޝަން އެންޑް މޮބިލިޓީއެވެ.

މީގެ ތެރެއިން ހިއުމަން ރައިޓްސް އެންޑް ޑިމޮކްރަސީގެ ދަށުން އެއް ޖިންސުން ގުޅުން ހިންގަން ފުރުސަތު ދިނުމާއި، އެބޯޝަން ހެދުމުގެ ހުއްދަ ދިނުމުގެ އިތުރުން ދީނީ މިނިވަންކަން ދިނުންވެސް ސަމޯއާ އެގްރީމެންޓުގައި ވަނީ ހިމަނައިފައެވެ.

އެހެންކަމުން މިއީ އިސްލާމްދީން ނޫން ދީނަކަށް ފުރުސަތު ނުދޭނެ ކަމަށް ރައީސް މުހައްމަދު މުއިއްޒު ވިދާޅުވި ވިދާޅުވާ ޚިލާފުވެފައިވާ ވުމެއްކަން ފާހަގަކޮށްލެވެއެވެ. މީގެ ކުރިން އެމްޑީޕީ ވެރިކަމުގައި އެމްޑީއެންއިން ނެރުނު ލާދީނީ ރިޕޯޓާ ގުޅިގެން އެ ރިޕޯޓު ނެރުނު ޖަމްއިއްޔާއާ އެ ޖަމްއިއްޔާގެ ވެރިންނަށްވެސް ފިޔަވަޅު އަޅަން ޖެހޭ ކަމަށް އެންމެ ބާރަށް ވާހަަ ދެއްކެވީ މިއަދުގެ ސަރުކާރުގެ ވެރިން ކަމަށްވާއިރު ދިނާ ޚިލާފު އެތައް ކަމެއް ހިމެނޭ އެގްރިމަންޓެއްގައި މި ސަރުކާރުން ބައިވެރިވެފައިޥާއިރު މިކަމުގައި ފިޔަވަޅު އަޅާނީ ކޮން ބަޔަކު ކޮންބަޔަކަށް ކަމާ މެދު ސުވާލު އުފެދެއެވެ.