ރާއްޖޭގެ 20 އިމާމަކު ތަމްރީނު ކުރުމަށް މި މަހު ބުރޫނާއިއަށް ފޮނުވަން ތައްޔާރުވެފައިވާކަމަށް އިސްލާމިކް މިނިސްޓަރ ވިދާޅުވެއްޖެއެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖެއިން ބޭރުން އިތުރު ތަމްރީނު ލިބިގަތުމުގެ ފުރުސަތުގެ ދަށުން، ބުރޫނާއީ ދާރުއްސަލާމަށް 20 އިމާމަކު މި މަހު 15 ގައި ފުރާނެ ކަމަށެވެ.

މި ތަމްރީނު ޕްރޮގްރާމް އޮންނާނީ ބުރޫނާއި ގެ ޤައުމީ އިސްލާމީ ޔުނިވަރސިޓީ، ސުލްޠާން ޝަރީފް އިސްލާމިކް ޔުނިވަރސިޓީގައި ކަމަށް ވަޒީރު ވިދާޅުވެފައިވެއެވެ. މީގެ ކުރިންވެސް ރާއްޖޭގެ އިލްމުވެރިންނާއި އިމާމުންނާއި ހަތީބުންނަށް ރާއްޖެއިން ބޭރުން އިތުރު ތަމްރީނު ދިނުމުގެ ފުރުސަތުގެ ދަށުން ސައުދީއަށް ވަނީ ފޮނުވާފައެވެ.

އިސްލާމިކް މިނިސްޓްރީން ކުރި އިއުލާނެއްގައި ވަނީ މި ޕްރޮގްރާމްގައި ބައިވެރިވާން ޝައުގުވެރިވާ އިމާމުންނަށް ފޯމު ހުށަހެޅުމުގެ ފުރުސަތު ހުޅުވާލައިފަ އެވެ. މި ތަމްރީނު ޕްރޮގްރާމުގައި ބައިވެރިވެވޭނީ ރާއްޖޭގައި މިވަގުތު ތިބި އިމާމުންނަށް ކަމަށް އެ އިއުލާނުގައި ބުންޏެވެ.

އަރަބި ބަހުން ރަނގަޅަށް ލިޔަން ކިޔަން އެގުމާ އެކު، ކަމާ ގުޅޭ ދާއިރާގައި މަސައްކަތްކުރާ މީހެއް ކަމަށް ވުމަކީ ޝަރުތެއް ކަމަށް ވެސް އެ އިއުލާނުގައި ބުނެފައިވެއެވެ.

މި ޕްރޮގްރާމްގައި ބައިވެރިވުމަށް އަންނަ ބުރާސްފަތި ދުވަހުގެ ކުރިން ފޯމު ހުށަހަޅަން ޖެހެއެވެ.

މިނިސްޓްރީން ބުނި ގޮތުގައި، އެއީ ހަތް ދުވަހުގެ ތަމްރީނު ޕްރޮގްރާމެއް ކަމަށާއި އެ ޕްރޮގްރާމް ކުރިއަށް ގެންދާނީ މި މަހު 16 އިން 22 އަށެވެ.