ސަރުކާރުގެ މަސް ކުންފުނި، މިފްކޯއަށް ދެމުންދާ ސަބްސިޑީ އޭނާގެ ވިޔަފާރިތަކަށް ވެސް ލިބެން ޖެހޭނެ ކަމަށާއި އަދި މިފްކޯއިން ނުނަގާ ކުއްޔެއް އެހެން ވިޔަފާރިއަކުން ވެސް ނެގިގެން ނުވާނެ ކަމަށް ރައްޔިތުންގެ މަޖިލީހުގެ މާލިއްޔަތު ކޮމިޓީގެ މުގައްރިރު ގާސިމް އިބްރާހިމް ވިދާޅުވުމާ ގުޅިގެން ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދުގެ ނުރުހުން އަމާޒުކުރައްވައިފއެވެ.

ޑރ. ޖަމީލުގެ ނުރުހުން ގާސިމަށް އަމާޒުކުރެއްވީ ފޭސްބުކްގައި ކުރެއްވި ޕޯސްޓެއްގައެވެ.

މަސް ގަންނަ އަގު ކުޑަކުރަން ސަރުކާރުން ނިންމި ނިމްމުމާއި މަސްވެރިންނަށް ޑޮލަރުން ފައިސާ ނުދޭ މައްސަލަ ބަލައިދޭން އެދި ހުޅުމާލެ ދެކުނު ދާއިރާގެ އެމްޑީޕީ މެންބަރު ޑރ. އަހްމަދު ޝަމްހީދު މާލިއްޔަތު ކޮމިޓީއަށް ހުށަހެޅުމުން ގާސިމްވަނީ އޭނާއަކީ މަސްވެރިކަމުގެ އިންޑަސްޓްރީއަށް 250 މިލިއަން ޑޮލަރަށް ވުރެ ގިނައިން އިންވެސްޓު ކޮށްފައިވާ މީހެއް ކަމަށާއި ސަރުކާރުގެ އިންވެސްޓްމަންޓުތަކަށް ވުރެ އޭނާގެ މާންދޫ އާއި ހޯނޑެއްދޫ "ވަރުގަދަވެފައި މޮޅުވާނެ" ކަމަށް ވިދާޅުވެފައެވެ.

އެގޮތުން ގާސިމްވަނީ އޭނާ ސަރުކާރުގައި އާދޭސްކޮށްފައި ހޯނޑެއްދޫގައި އިންވެސްޓްމަންޓު ނިންމަން ވެގެން 100 މިލިއަން ރުފިޔާ ދޭށޭ ވިދާޅުވިކަމަށް ވިދާޅުވެފައެވެ. އަދި ދަރަންޏަށް ފަސް އަހަރު ނޫނީ ހަ އަހަރުގެ ތެރޭގައި ދައްކަން ލޯނެއް ދޭށޭވެސް ވިދާޅުވި ކަމަށާ ނަމަވެސް އޭނާއަށް ޖަވާބު ވެސް ނުދިންކަމަށް އެ ވާހަކަ ކުރިއަށްގެންދަވަމުން ގާސިމް ވިދާޅުވި އެވެ. އަދި އެއީ ނިމިގެންދިޔަ އެމްޑީޕީގެ ސަރުކާރުގެ ވާހަކަ ކަމަށާއި އެ ސަރުކާރުން އެހެން ވިޔަފާރިވެރިންނަށް މަސްވެރިކަމުގެ އިންޑަސްޓްރީގައި އިންވެސްޓު ކުރަން ލޯނު ދިން ކަމަށް ގާސިމް ވިދާޅުވި އެވެ. ބޮޑު ކަންނެލި މަސްވެރިކަމަށް ލޯނު ދިން ކަމަށް ވަކި ކުންފުންޏެއްގެ ނަން ފާހަގަނުކޮށް ގާސިމް ވިދާޅުވިއެވެ.

ކަންކަން މިހެން އޮތްއިރު މިފްކޯއަށް ސަބްސިިޑީ ދީގެން އެ ކުންފުނި ހިންގަމުންދާ ކަމަށާއި އޭނާއަށް ދޫކޮށްފައިވާ ތަންތަނުން ކުލި ނަގާކަމުގެ ޝަކުވާ ވެސް ގާސިމް ކުރެއްވި އެވެ. އެއް މަސައްކަތެއް ކުރާ ބަޔަކަށް އެއް ގޮތަކަށް ކަންކަން ކުރަން ޖެހޭ ކަމަށް ގާނޫނު އަސާސީގެ ރޫހުން ދައްކުވައިދޭ ކަމަށް އޭނާ ވިދާޅުވިއެވެ.

ގާސިމްގެ މި ވާހަކަތަކާ މެދު ހިތްޕުޅު ހަމަނުޖހިެ ޑރ. ޖަމީލު ވަނީ ގާސިމަށް މެސެޖެއް ދެއްވާފައެވެ. އެގޮތުން އިއްޒަތްތެރި މެމްބަރު ގާސިމަށް އެގޮތަށް މަޖިލިހުގައި ވާހަކަ ދެއްކުމަށް ގާނޫނު އަސާސީގެ 75 ވަނަ މާއްދާއިން ފުރުޞަތު ނުދޭކަމަށް ވިދާޅުވެފައިވެއެވެ.

އެގޮތުން ރައްޔިތުންގެ މަޖިލީހަކީ އަމިއްލަ ވިޔަފާރި އަދި މަޞްލަޙަތު ކުރިއަރުވަން އޮންނަތަނެއް ނޫން ކަން ފާހަގަކުރައްވާ ޑރ. ޖަމީލު ވަނީ ގާސިމްގެ ވާހަކަތައް ހަރުކަށި އިބާރާތުން ކުށްވެރިކޮށް، އޭނާއަށް ފިޔަވަޅު އަޅަން ގޮވާލާފައެވެ.

ގާނޫނު އަސާސީގެ 75ވަނަ މާއްދާގައި ބުނެފައިވަނީ ރައްޔިތުންގެ މަޖިލީހުގެ މެމްބަރުން ޢަމަލުކުރަންވާނީ، ގައުމީ މަސްލަހަތާ ރައްޔިތުންގެ ލާބަޔާ މަންފާއަށް އިސްކަން ދީގެން ކަމަެވެ. އަދި އެއްވެސް މެމްބަރަކު އެމީހެއްގެ ނުވަތަ އެމީހަކާ ޚާއްސަ ގުޅުމެއް އޮންނަ އެހެން މީހެއްގެ ވެސް ޒާތީ މަސްލަޙަތެއް ކުރިއެރުވުމަށް މަގާމުގެ ބޭނުންކޮށްގެން ނުވާނެ ކަމަށެވެ. އަދި އެ މެމްބަރަކު އެ މެމްބަރަކި އިންތިޚާބުވީ ދާއިރާތައް ތަމްސީލުކުރުމުގައި މުޅި ގައުމާ ހުރިހާ ރައްޔިތުންގެ ލާބަޔާ މަންފާއަށް ރިއާޔަތް ކުރަންވާނެ ކަމަށެވެ.